Opera ánshisi Marııa Mýdrıak jol apatyna ushyrady
NUR-SULTAN. QazAqparat – Tanymal opera ánshisi, Daryn jastar syılyǵynyń ıegeri Marııa Mýdrıak jol apatynan aman qaldy, dep habarlaıdy QazAqparat.
«Men Qazaqstandamyn, keshe bizdiń ekinshi týǵan kúnimiz boldy! Eń aldymen otbasymyzdyń atynan qıyn sátte beı-jaı qalmaı, kómekke kelgen barlyq meıirimdi jáne qamqor adamdarǵa raqmet aıtqym keledi! Biz Pavlodarǵa úıge bara jattyq jáne kóktaıǵaqtan kóligimiz eki ret aýdarylyp, jyraǵa ushyp ketti. Qudaıǵa shúkir, bárimiz aman qaldyq», - dep jazdy ánshi Instagram jelisinde.
Onyń aıtýynsha, ótip jatqan kólikterdiń bári toqtap, 15 adam qardan shyǵarýǵa kómektesken.
«Men olardyń attaryn bilmeımin, biraq osyndaı qamqor adamdar barda álemniń tynysy toqtamaıdy! Mine, bizdiń qazaqstandyqtar osyndaı. Barshańyzǵa raqmet!!!», - deıdi M. Mýdrıak.
Eske sala ketsek, aýa raıynyń nasharlaýyna baılanysty Pavlodar oblysynyń joldarynda avtokóliktiń barlyq túrleriniń qozǵalysyna shekteý qoıylǵan.
