OpenAI JI qaýipsizdigi boıynsha halyqaralyq uıym qurýdy usyndy
ASTANA. KAZINFORM — OpenAI AQSh, Qytaı jáne basqa da elderdiń qatysýymen jasandy ıntellektini qadaǵalaý men retteýdiń halyqaralyq negizin qurýdy usyndy.
Bul týraly Bloomberg agenttigi kompanııanyń jahandyq máseleler jónindegi vıtse-prezıdenti Krısa Leheın sózine silteme jasap habarlady.
Onyń aıtýynsha, jasandy ıntellekt tehnologııalary dástúrli saýda jáne ulttyq máseleler sheńberinen shyǵyp barady, sondyqtan álemge jańa jahandyq úılestirý júıesi qajet.
OpenAI ókili bolashaq uıym ıadrolyq energetıka salasyndaǵy halyqaralyq qaýipsizdik standarttaryna jáne ıadrolyq qarýdyń taralýyna jol bermeýge jaýapty Atom energııasy jónindegi halyqaralyq agenttiktiń (MAGATE) qaǵıdattary boıynsha jumys isteı alatynyn atap ótti.
Kompanııada mundaı qurylymdy qurý jolyndaǵy qadamdardyń biri retinde AQSh-tyń JI standarttary men ınnovatsııalary ortalyǵy men jasandy ıntellekt qaýipsizdigi jónindegi uqsas halyqaralyq ınstıtýttar arasyndaǵy yntymaqtastyq qarastyrylyp otyr.
Agenttik málimetinshe, Vashıngtonda zamanaýı JI júıeleri qarjy ınfraqurylymy men qalalyq qyzmetter úshin aýqymdy qaýip tóndirýi múmkin degen alańdaýshylyq bar.
Sonymen qatar OpenAI AQSh-tyń memlekettik zertteý qurylymdaryn ozyq JI modelderin keńinen engizbes buryn jabyq ári qorǵalǵan ortada tekserýdi mindetteýdi usyndy.
Buǵan deıin Japonııanyń iri bankteri kıberqaýipsizdikti nyǵaıtý jáne qarjylyq ınfraqurylymyna kıbershabýyldardyń aldyn alý úshin amerıkalyq Anthropic kompanııasynyń jasandy ıntellekt tehnologııalaryn qoldanatyny týraly jazdyq.
