OpenAI jasóspirimderge arnalǵan ChatGPT-diń arnaıy nusqasyn iske qosty
ASTANA. KAZINFORM — OpenAI kompanııasy 13 pen 17 jas aralyǵyndaǵy paıdalanýshylarǵa arnalǵan, qaýipsizdik sharalary kúsheıtilgen ChatGPT for Teens chat-botynyń arnaıy nusqasyn iske qosty, dep habarlaıdy Euronews.
Jańa nusqada ózine-ózi zııan keltirýge qatysty kontentke, sondaı-aq romantıkalyq jáne seksýaldyq sıpattaǵy qarym-qatynasqa qosymsha shekteýler qarastyrylǵan. Sondaı-aq júıe jasóspirimge chat-bottyń oǵan jeke sezimi nemese sana-sezimi men emotsııasy bar degen áser qaldyrmaýy tıis.
OpenAI málimetinshe, júıe paıdalanýshynyń jasy 18-ge tolmaǵanyn anyqtasa nemese paıdalanýshy ózi 13-17 jas aralyǵynda ekenin kórsetse, onyń akkaýnty avtomatty túrde ChatGPT for Teens nusqasyna aýystyrylady.
Baǵdarlamany ázirleýshiler jasandy ıntellektini oqý maqsatynda paıdalanýǵa da erekshe kóńil bólgen. Jasóspirimderge arnalǵan ChatGPT oqýshylarǵa daıyn jaýaptar men oryndalǵan tapsyrmalardy usyna salmaı, sheshimdi ózdiginen tabýǵa jáne oqý materıalyn túsinýge kómektesýi kerek.
Sondaı-aq ata-ana baqylaýyna arnalǵan quraldar qarastyrylǵan. Akkaýnttardy baılanystyrý arqyly ata-analar jasóspirimniń ChatGPT-di paıdalana almaıtyndaı «tynysh ýaqytty» belgileı alady. Al qaýip deńgeıi joǵary bolǵanyn baıqaǵan sátte balanyń qaýipsizdigine qatysty habarlamalar alady. Bul rette ata-ana baqylaýyn qosý úshin jasóspirimniń kelisimi qajet.
Agenttik atap ótkendeı, jańa sharalar ata-analar, pedagogter men mamandar arasynda jasóspirimderdiń jasandy ıntellekt chat-bottarymen qarym-qatynasy jáne olarǵa emotsıonaldyq táýeldi bolyp qalý qaýpine qatysty alańdaýshylyq kúsheıgende engizilip otyr.
Common Sense Media uıymynyń 2025 jylǵy zertteýine sáıkes, AQSh-taǵy jasóspirimderdiń 70 paıyzdan astamy JI chat-bottardy qarym-qatynas jasaý úshin paıdalanǵan.
OpenAI málimdeýinshe, jańa nusqanyń maqsaty — jasóspirimderge jasyna saı orta qalyptastyryp, jasandy ıntellektini oqý men synı oılaý qabiletin damytýǵa paıdalanýǵa múmkindik berý jáne bul rette qaýipsizdikti qamtamasyz etetin qatań sharalardy kúsheıtý.
Aıta keteıik, buǵan deıin ChatGPT kámeletke tolmaǵandardy qorǵaýdy kúsheıtý úshin paıdalanýshylardyń jasyn avtomatty túrde anyqtaı bastaǵany týraly jazdyq.
