OpenAI-men básekege túsken qupııa JI: Ox Alpha-ny kim jasady
ASTANA. KAZINFORM – Ox Alpha dep atalatyn jańa jasandy ıntellekt júıesiniń paıda bolýy sarapshylar men tehnologııa qoldanýshylary arasynda qyzý talqylaý týǵyzdy. Bul týraly Euronews jazdy.
Modeldi kim ázirlegeni belgisiz. Ol 20 tamyzda OpenRouter platformasynda ázirleýshisi kórsetilmegen jabyq stealth-model retinde paıda boldy.
Ox Alpha ashyq bastapqy kodty júıe emes. Qazir ony 27 tamyzǵa deıin tegin synaq rejıminde paıdalanýǵa bolady. Odan keıin modelge qoljetimdilik aqyly bola ma, ázirge belgisiz.
Ázirleýshisi men ıesi jarııalanbaǵanymen, sarapshylar Ox Alpha Qytaıdyń Zhipu AI kompanııasy áli tanystyrmaǵan GLM-5.x modelder serııasyna jatýy múmkin dep boljap otyr. Alaıda bul aqparat resmı túrde rastalǵan joq.
Osy jaǵdaı Qytaıdyń jasandy ıntellekt salasyndaǵy jahandyq básekede AQSh bastaǵan Batys elderin basyp ozýy múmkin degen pikirtalasty kúsheıtti. Buǵan Qytaıda joǵary tehnologııalyq, keıde ázirleýshisi bastapqyda jarııalanbaıtyn JI modelderiniń jıi paıda bolýy sebep bolyp otyr.
Buǵan deıin Alibaba jáne ByteDance sekildi qytaılyq kompanııalar da keıbir modelderin alǵash shyǵarǵan kezde olardy ózderi ázirlegenin birden jarııalamaǵan.
Mundaı tásil kompanııalarǵa jańa ári qýatty modelderdi ázirleýshiniń atyn jarııalamaı synaýǵa múmkindik beredi. Sonymen qatar onyń eksporttyq baqylaý men retteýshi talaptarǵa yqpalyna qatysty da pikirtalas bar.
Ox Alpha nesimen qýatty
Baǵdarlamalaý boıynsha DeepSWE sekildi test nátıjeleri Ox Alpha-nyń OpenAI jáne Anthropic sııaqty jetekshi kompanııalardyń úzdik modelderinen kem túspeıtinin, keıbir kórsetkishter boıynsha olardan asyp túsetinin kórsetti.
Modeldiń kontekstik terezesi 1 mln tokennen asady. Ol mátin, sýret jáne vıdeony óńdeı alady, al bir jaýapta 131 072 tokenge deıin aqparat usynýǵa qabiletti.
Ox Alpha kúrdeli baǵdarlamalaý, aýqymdy derekterdi óńdeý jáne avtonomdy JI agentteriniń uzaqmerzimdi jumysyn oryndaýǵa beıimdelgen.
Servıs málimetinshe, paıdalanýshylardyń suraýlary saqtalǵanymen, modeldi oqytý úshin qoldanylmaıdy. Alaıda bul aqparat ázirge táýelsiz túrde rastalǵan joq.
Ox Alpha-nyń paıda bolýy Qytaıdyń JI salasyndaǵy qarqynyn taǵy kórsetti. Elde jasandy ıntellekt strategııalyq basymdyq retinde qarastyrylyp, kompanııalarǵa jańa modelderdi jyldam ázirlep, naryqqa shyǵarýǵa múmkindik berilip otyr.
Al AQSh-taǵy JI kompanııalary qymbat tehnologııalar, eksporttyq shekteýler men chıp jetkizýge qatysty talaptarǵa baılanysty ónimderin kóbine kezeń-kezeńimen shyǵarýǵa májbúr.
Eske sala ketsek, buǵan deıin qazaqstanda kásipkerlerge arnalǵan AI-navıgator iske qosylǵanyn jazdyq.
