OpenAI kıberqaýipsizdik máselesi úshin AI modelderin oqytýdy ýaqytsha toqtatty
ASTANA. KAZINFORM — OpenAI kıberqaýipsizdik salasyndaǵy táýekelderge baılanysty jańa jasandy ıntellekt modelderin oqytý jumystaryn eki aptaǵa ýaqytsha toqtatty. Bul týraly kompanııanyń saıtynda jarııalanǵan málimdemede aıtylǵan.
Kompanııa bul sheshimdi OpenAI men Hugging Face arasyndaǵy oqıǵaǵa, sondaı-aq ázirlenip jatqan Astra modeliniń kıberqaýipsizdik salasynda «krıtıkalyq deńgeıge» jetýi múmkin ekenin kórsetken aldyn ala derekterge baılanysty qabyldaǵan.
OpenAI endi baqylaý jáne qorǵaý júıelerin kúsheıtýdi josparlap otyr.
Kompanııanyń málimetinshe, AI modelderiniń múmkindigi artqan saıyn, olardy ázirleý men synaqtan ótkizýge baılanysty táýekelder de kóbeıedi. Sondyqtan qaýipsizdik pen baqylaý talaptary jasandy ıntellekttiń damý qarqynynan alda bolýy kerek.
— Osy talaptarǵa tolyq saı bolý úshin qajetti ýaqytty bólgimiz keldi. Sondyqtan modelderdi aýqymdy túrde oqytý qarqynyn ýaqytsha báseńdettik, — delingen kompanııa habarlamasynda.
OpenAI eki aptalyq úzilis kezinde zertteý ınfraqurylymynyń qorǵanysyn kúsheıtip, qaýipsizdik júıelerin qosymsha synaqtan ótkizgenin jáne baqylaý tetikterin keńeıtkenin málimdedi.
Al Astra modeli men kıberqaýipsizdikke qatysty ázirlemeler úshin OpenAI zertteý ortasynyń qaýipsizdigine qoıylatyn eń qatań talaptardy engizedi. Olar jumys protsesterin oqshaýlaýdy, jelige kirý múmkindigin qosymsha shekteýdi jáne qaýipsizdik júıelerin úzdiksiz testileýdi qamtıdy.
Eske sala keteıik, buǵan deıin AQSh-tyń bas prokýrorlary OpenAI-ge qatysty tergeýdi bastaǵanyn jazdyq.
