OpenAI Qazaqstannyń bilim júıesine jasandy ıntellekt engizýge atsalysady
ASTANA.KAZINFORM - Jasandy ıntellekt salasyndaǵy halyqaralyq kóshbasshy OpenAI kompanııasy ókilderiniń Qazaqstandaǵy sapary jalǵasyp jatyr. Bilim berý salasyna JI-di engizý boıynsha ulttyq joba aıasynda OpenAI ókilderi bastamanyń tehnologııalyq seriktesi — Bilim Group komandasymen kezdesti.
Kelissózder barysynda taraptar jańa býyn pedagogteri men mamandardy daıarlaý, oqý oryndaryna JI negizindegi zamanaýı bilim berý quraldaryn engizý, sonymen qatar elimizdiń bilim berý mekemelerinde JI-di qoldanýdyń ozyq tájirıbelerin taratý baǵytynda birlesip jumys atqarý jolyn talqylady.
Sondaı-aq yntymaqtastyqtyń jańa baǵyttary qaraldy. Qazaqstandyq kompanııa ChatGPT Edu jobasynyń eldegi tehnologııalyq seriktesi bolyp úlgerdi, al qazirgi ýaqytta OpenAI-dyń resmı aımaqtyq seriktesi ataný týraly másele talqylanyp jatyr.
– Biz birlesken jumystyń, ásirese, otandyq bilim berý platformalaryna OpenAI sheshimderin kiriktirýdiń áleýeti zor dep esepteımiz. Bul qadam álemdik deńgeıdegi jergilikti servısterdi ázirleýge jáne JI-di bilim berý salasyna engizýdiń halyqaralyq úlgisin kórsetýge múmkindik beredi. Osylaısha Qazaqstanda JI salasyndaǵy quzyretterdiń tolyqqandy ekojúıesin qalyptastyrýǵa bolady. Aldaǵy ýaqytta biz OpenAI-men bilim berý baǵytynan bólek, ekonomıkanyń túrli salasyndaǵy mamandardyń biliktiligin arttyrý jáne JI quzyretterdi damytý boıynsha B2B seriktes retinde jumys isteýdi josparlap otyrmyz, — dep atap ótti Bilim Group bas dırektory Aleksandr Savchenko.
Aıta keterligi, Qazaqstan OpenAI kompanııasy ChatGPT Edu bilim berý bastamasyn júzege asyrý úshin tańdap alǵan álemdegi alǵashqy alty eldiń qataryna kirdi. Joba oqytýshylarǵa oqý, zertteý jáne bilim berý baǵdarlamalaryn ázirleý úshin jasandy ıntellektiniń zamanaýı quraldaryna qoljetimdilik usynýǵa baǵyttalǵan.
OpenAI málimetteri boıynsha, Qazaqstan jasandy ıntellektini qoldaný deńgeıi joǵary elderdiń qataryna kiredi. ChatGPT-di eń belsendi paıdalanýshylar — 18 ben 34 jas aralyǵyndaǵy jastar. Qazaqstandyqtar jasandy ıntellektini kóbinese aqparat izdeý, praktıkalyq usynystar alý, mátinder jazý jáne olardy óńdeý úshin qoldanady.
Jumys kezdesýleri aıasynda pedagogterdi daıarlaý, jasandy ıntellekt boıynsha sarapshylar jelisin qalyptastyrý, JI-quraldardy engizý, sonymen qatar OpenAI-dyń zamanaýı tehnologııalaryn paıdalana otyryp, ulttyq bilim berý sheshimderin damytý máselelerin qarastyrdy.
OpenAI ókili Karlotta Revılonyńaıtýynsha, mundaı bastamalardy sátti engizý halyqaralyq sheshimderdi ulttyq bilim berý júıesiniń erekshelikterine beıimdeı alatyn jergilikti seriktestersiz múmkin emes.
– Osyndaı aýqymdy joba aıasynda jumys isteý — biz úshin zor mártebe. Maqsatymyz — balabaqsha pedagogterinen bastap joǵary oqý oryndarynyń oqytýshylary men zertteýshilerine deıin bilim berý salasyndaǵy mamandardyń ChatGPT quraldaryna qol jetkizýin qamtamasyz etý. Bul tehnologııalardy ǵylymı zertteýlerde, sabaq berýde, oqý baǵdarlamalaryn ázirleýde jáne jalpy bilim berý protsesinde keńinen qoldanýǵa bolady, - deıdi Karlotta Revılo.
Sapar baǵdarlamasy aıasynda OpenAI delegatsııasy Qazaqstannyń bilim berý salasynyń mamandarymen, joǵary oqý orny ókilderimen kezdesip, JI-di oqý protsesinde qoldaný boıynsha birqatar vorkshop men praktıkalyq sessııa ótkizdi.
Jasandy ıntellekt qazaqsha jańalyqtardy ym tiline aýdaratynyn jazǵan bolatynbyz.
