OpenAI Qazaqstannyń 165 myń pedagogine tegin lıtsenzııa beretin boldy
ASTANA. KAZINFORM — OpenAI kompanııasy mektepter men joǵary oqý oryndarynyń 165 myń pedagogine tegin lıtsenzııalar beredi. Bul týraly Ǵylym jáne joǵary bilim vıtse-mınıstri Gúlzat Kóbenova aıtyp berdi.
Onyń aıtýynsha, JI, ınjınırıng jáne JI tsıfrlyq tehnologııalary boıynsha jańa bilim berý baǵdarlamalaryn daıarlaý bastaldy. 30 joǵary oqý orny JI boıynsha 42 bilim berý baǵdarlamasyn engizdi, olardyń qatarynda: «Qoldanbaly JI», «JI ınjenerııasy jáne blokcheın», «Medıtsınadaǵy JI» bar. Onda bakalavrıat, magıstratýra jáne doktorantýra boıynsha 2 815 stýdent bilim alyp jatyr.
Professor-oqytýshylar quramynyń 54%-dan astamy JI boıynsha oqýdan ótti.
– Kelesi qadam – akademııalyq etıkany qatań saqtaı otyryp, oqytýshynyń júktemesin azaıtatyn jáne daıarlyq sapasyn arttyratyn basqarylatyn ári qaýipsiz qural retinde ChatGPT Edu-dy engizý. OpenAI kompanııasymen ózara túsinistik týraly memorandým aıasynda mektepter men joǵary oqý oryndarynyń 165 myń pedagogyna tegin lıtsenzııalar beriledi, – dedi G. Kóbenova Ortalyq kommýnıkatsııalar qyzmetinde ótken brıfıngte.
Bul qazaqstandyq pedagogtarǵa mynadaı múmkindikter beredi dep kútilýde:
● Kúndelikti tapsyrmalardy avtomattandyrý (esepter daıyndaý, tapsyrmalardy tekserý).
● Stýdentter úshin oqý josparlary men materıaldaryn derbestendirý.
● Derekterdi taldaý jáne qujattardy túıindeýdiń ozyq fýnktsııalaryn paıdalaný.
● Óz kýrstary úshin kastomızatsııalanǵan AI-assıstentter men chat-bottar qurý.
Bul quraldy engizý pedagogıkalyq akselerator qyzmetin atqaryp, qysqa merzimde eldegi oqytý ádistemelerin júıeli túrde jańartýǵa jáne pedagogterdiń ózderin jańa AI-paradıgmasynda jumys isteýge daıyndaýǵa baǵyttalǵan.
Coursera-men dál osyǵan uqsas joba óz nátıjeliligin kórsetti. 3 jylda 235 myńnan astam stýdent 503,7 myńnan astam sertıfıkat alǵan.
– Coursera Qazaqstandy bilim berýdi tsıfrlyq transformatsııalaý boıynsha álemdik kóshbasshylardyń biri retinde resmı túrde tanydy. Bir jylda stýdentterdiń «Barshaǵa arnalǵan generatıvti JI» kýrstar blogyna qyzyǵýshylyǵy artyp, alynǵan sertıfıkattar sany 2024 jylǵy 5 573-ten 2025 jyly 41 159-ǵa deıin ósti, – dedi vıtse-mınıstr.
Uqsas dınamıka prompt-ınjenerııaǵa arnalǵan kýrstar boıynsha da baıqalady. «ChatGPT-ge arnalǵan prompt ınjenerııa» kýrsy boıynsha sertıfıkattar sany 2025 jyly 33 898-ge deıin artty. Taǵy bir tanymal kýrstardyń biri – «ChatGPT arqyly jańashyl oqytý» (10 783 sertıfıkat).
Aıta keteıik, 2025 jyly memleket tarapynan 93 myń bilim berý granty bólinip, onyń 99%-dan astamy tolyq ıgerildi.