OpenAI basshysynyń úıin órtemekshi bolǵan adamǵa aýyr aıyp taǵyldy
ASTANA. KAZINFORM – AQSh-ta Tehas shtatynyń 20 jastaǵy turǵynyna OpenAI basshysy Sem Altmannyń úıine «Molotov kokteılimen» shabýyl jasaǵany úshin kisi óltirýge oqtalý babymen aıyp taǵyldy, dep habarlaıdy Reuters.
AQSh bıliginiń málimetinshe, kúdikti Sem Altmannyń San-Frantsıskodaǵy úıine janǵysh qospa quıylǵan bótelke laqtyrǵan. Oqıǵa saldarynan úıdiń syrtqy qaqpasy órtengen, alaıda zardap shekkender joq.
Tergeý barysynda kúdiktiden zorlyq-zombylyqqa úndeıtin materıaldar men jasandy ıntellekt saldarynan adamzattyń joıylyp ketýi múmkin ekeni týraly eskertýler jazylǵan qujattar tabylǵan. Qujattardyń birinde «Bizdiń taıap kele jatqan joıylýymyz týraly taǵy birneshe sóz» degen ataý bolǵan.
Kúdiktige kisi óltirýge oqtalýdan bólek, birneshe aýyr qylmys, sonyń ishinde qarýdy zańsyz saqtaý jáne jarylǵysh zattardy paıdalanyp múlikke qasaqana zııan keltirýge áreket jasaý aıyptary taǵylǵan. Eger kinási dáleldense, ol uzaq merzimge bas bostandyǵynan aıyrylýy múmkin.
Prokýrorlardyń aıtýynsha, tergeý áli bastapqy kezeńde. Sonymen birge bul áreket keıin ishki terrorızm aktisi retinde de qaıta saralanýy múmkin ekeni joqqa shyǵarylmaıdy.
Tergeý materıaldaryna sáıkes, kúdikti OpenAI keńsesin de órtep jiberemin dep qorqytqan. Onyń janynan kerosın, ottyq jáne jasandy ıntellekt kompanııalary basshylary men ınvestorlaryna qarsy baǵyttalǵan tizim tabylǵan.
Sońǵy ýaqytta OpenAI men onyń basshysy Sem Altman jasandy ıntellektini adamzatqa qaýip dep sanaıtyn toptardyń narazylyq nysanyna aınalyp otyr.
Aıta keteıik, OpenAI basshysy jasandy ıntellektini retteıtin jahandyq organ qurýǵa shaqyrdy.
