OpenAI balalardy qorǵaý úshin ChatGPT-ge jasty tekseretin júıe engizedi
ASTANA. KAZINFORM – Amerıkalyq OpenAI kompanııasy ChatGPT paıdalanýshylarynyń jasyn tekserý júıesin engizbek. Júıe kámeletke tolmaǵandardy qorǵaýǵa baǵyttalǵan. Sheshim kalıfornııalyq jasóspirim qaıtys bolǵannan keıin qabyldandy, dep habarlaıdy Kazinform agenttiginiń menshikti tilshisi The Guardian-ǵa silteme jasap.
Endi paıdalanýshynyń jasy platformamen ózara árekettesý kezinde anyqtalady. Kúmán týyndaǵan kezde, ChatGPT avtomatty túrde «18 jasqa deıin» profılimen shekteledi, al keıbir jaǵdaılarda qujattar arqyly jasyn rastaý qajet.
Kámeletke tolmaǵandar úshin grafıkalyq jynystyq mazmun men sýıtsıd týraly pikirtalastar, sondaı-aq flırt formalary men psıhologııalyq qaýipti taqyryptar shekteledi. Sýıtsıdtik oılardyń belgileri anyqtalǵan kezde ata-analarǵa nemese tıisti organdarǵa habarlaý josparlanyp otyr.
OpenAI jańa sharalar jasóspirimder men psıhologııalyq problemalary bar paıdalanýshylardyń qaýipsizdigin birinshi orynǵa qoıady, tipti bul qupııalylyq deńgeıin tómendetse de. Kompanııa sonymen qatar derekterdi qorǵaýdy kúsheıtedi jáne qyzmetkerlerdiń olarǵa qol jetkizýin shekteıdi.
Aıta keteıik, sáýir aıynda AQSh-ta 16 jastaǵy jasóspirim ózin-ózi óltirý máselelerin talqylap, chat-botpen birneshe aı sóıleskennen keıin óz-ózine qol jumsady. Jasóspirimniń otbasy OpenAI men bas dırektor Sem Altmanǵa qarsy shaǵymdanyp, platforma onyń sheshimine áser etti dep aıyptady.
Sonymen qatar AQSh-ta ChatGPT jasandy ıntellekti burynǵy Yahoo qyzmetkerin anasyn óltirip, artynsha ózin-ózi óltirýge ıtermelegen bolýy múmkin. 56 jastaǵy Erık Solberg paranoııadan zardap shekken. Ol ózin únemi tehnologııalar arqyly ańdyp júr dep oılaǵan, tipti ony qart anasy da baqylaıdy dep sengen. Erık bul kúmánderin chat-botpen bólisken, al ChatGPT onyń aqyl-esi durys ekenin aıtyp, onyń oılarymen kelisken.
ChatGPT-pen jeke áńgimelesý zańdyq kepildiktermen qorǵalmaıdy jáne olardy sot protsesterinde paıdalanýǵa bolady.
Tsıfrlyq damý, ınnovatsııalar jáne aeroǵarysh mınıstrligi Jasandy ıntellekt jáne ınnovatsııalardy damytý komıteti tóraǵasynyń orynbasary Álibek Saılanbaev ChatGPT-diń kómegine júgingen kezde derekterdi urlatyp almaý úshin qandaı saqtyq sharalaryn qoldaný kerektigin aıtty.