Open Fighting Championship týrnırine úsh qazaqstandyq qatysady
NUR-SULTAN. QazAqparat – 20 aqpanda Reseıdiń Samara qalasynda Open Fighting Championship halyqaralyq jekpe-jek týrnıri ótedi. Josparlanǵan 17 jekpe-jekte álemniń 9 eliniń faıterleri baq synasady, dep habarlaıdy QazAqparat SPORTINFORM portalyna silteme jasap.
Týrnır anderkardynda eki qazaqstandyq óner kórsetedi: qaraǵandylyq Konstantın Cherednıchenko (65,8 keli) jergilikti sportshy Danıl Konnovqa qarsy shyqsa, atyraýlyq Talǵat Jumaǵalıev (56,7 kg) pen reseılik Gýseın Halıkov ózara myqtyny anyqtaıdy.
Taǵy bir qazaqstandyq - «Atyrau Top Team» komandasynyń múshesi Samat Jaǵyparov týrnırdiń meınkardyn ashyp, lıganyń OFC chempıondyq belbeýi men júlde qory 1 mıllıon rýbl (shamamen 6 mln teńge) bolatyn Gran-Prıdiń ¼ fınalynda jekpe-jekke shyǵady. Jaǵyparovtyń qarsylasy – armenııalyq Aık Kazarıan. Salmaq dárejeleri – 61,2 keli.
Open Fighting Championship-tiń basty jekpe-jegi reseılik Vıktor Kolesnık pen nokaýtshy Elısmar «Karrasko» Lıma arasynda ótpek. Sondaı-aq negizgi aıqastyń birinde kópshiliktiń súıiktisi tájikstandyq Sharaf Davlatmýrodov brazılııalyq Adrıano Balbıge qarsy shyǵady.
Samarada ótetin mıkstfaıt keshin FullHD sapasynda qazaqstandyq INSPORT – insporttv.kz sporttyq telearnasynan tegin tamashalaýǵa bolady.
