Open Almaty-ǵa almatylyqtardan 395 myńnan astam ótinish túsken
ALMATY. QazAqparat - Almaty ákimdiginiń Open Almaty qoǵamdyq qabyldaýyna túsken 395,5 myń ótinishtiń 87%-i birden sheshildi. Bul týraly onlaın brıfıng kezinde «Almaty qalasyn damytý ortalyǵy» qoǵamdyq kommýnıkatsııalar Departamentiniń dırektory Álııa Jaqsalyqova aıtty, dep habarlaıdy QazAqparat tilshisi.
Onyń aıtýynsha, 337,6 myń ótinish - Open Almaty baılanys ortalyǵy (1308, 338-33-88) arqyly, 40,5 myń - áleýmettik jeliler, 15,6 myń ótinish open-almaty.kz portaly arqyly túsken.
«2019 jyldyń sáıkes kezeńimen salystyrǵanda ótinishter sany 206%-ke artty. Bul kórsetkish Almaty qalasynda karantın rejıminiń engizilýine baılanysty ósip otyr. 16 naýryzdan bastap Open Almaty qala turǵyndaryna koronavırýstyq ınfektsııanyń taralýyna qarsy bılik qabyldap jatqan sharalar týraly jedel konsýltatsııa beretin baılanys ortalyǵy retinde jumys isteıdi. Qala tynys-tirshiliginiń túrli baǵyttary: abattandyrý, aǵashkesý jáne qoqys jınaý, jol jóndeý jáne ınjenerlik jelilerdi aýystyrý, balabaqshaǵa joldama alý jáne qala ákimdiginiń quzyretine jatatyn ózge de ótinishterdi qabyldaý jáne tirkeý toqtatylmady», - dedi spıker.
Ótinishterdiń kópshiligi azyq-túlik jáne dári-dármek túrindegi áleýmettik kómek alý (81,6 myń), Almatyǵa kelý/ketý (36,8 myń), orta jáne mektepke deıingi bilim berý (31,7 myń), járdemaqy alý (24,3 myń) jáne Almatyda júrip-turý (23 myń) máseleleri týraly boldy.
Almaty ákimdiginiń Open Almaty qoǵamdyq qabyldaýyn 2017 jyly Almaty qalasy ákimdiginiń bastamasymen Almaty qalasyn damytý ortalyǵy ashqan bolatyn.
Joba «Halyq únine qulaq asatyn memleket» tujyrymdamasy aıasynda júzege asyrylyp jatyr. 3 jyl ishinde Open Almaty jergilikti bılik organdary ókilderi men qala turǵyndary arasyndaǵy basty dıalog alańdarynyń birine aınaldy.
«Open Almaty júıesi árbir ótinishtiń oryndalýyn jiti qadaǵalaýǵa múmkindik beredi. «Jeke jáne zańdy tulǵalardyń ótinishterin qaraý tártibi týraly» QR Zańyna sáıkes baılanys ortalyǵy, front-ofıs jáne open-almaty.kz aqparattyq portaly arqyly túsken ótinishterdi 15 kúntizbelik kún ishinde qaralady. Eger memlekettik organ ókilderiniń oqıǵa ornyna baryp, tekserý júrgizýi qajet bolsa, onda 30 kúntizbelik kún jumsalady. Áleýmettik jelilerdegi ótinishter 3-5 jumys kúni ishinde qaralady», - dedi Á.Jaqsalyqova.
Aýdan ákimderiniń apparattaryna jáne keıbir basqarmalarǵa joldanǵan ótinishter Open Almaty-da avtoryn belgileý talabynsyz qaralady.
Al quqyq qorǵaý organdaryna jáne qadaǵalaý organdaryna joldanǵan, tekserý júrgizýdi talap etetin (mysaly, Polıtsııa departamenti, Ákimshilik polıtsııa basqarmasy, Sanıtarııalyq-epıdemıologııalyq baqylaý departamenti, Ekologııa departamenti, Memlekettik kirister departamenti, Qala qurylysyn baqylaý basqarmasy jáne t.b.), avtoryn belgilemeı jiberý múmkin emes, qoltańbasy, onyń ishinde elektrondyq tsıfrlyq qoltańbasy, aryz berýshiniń poshtalyq mekenjaıy joq ótinishter zańnamaǵa sáıkes anonımdi ótinish sanalady jáne qaralmaıdy. Mundaı jaǵdaıda Open Almaty operatorlary turǵynǵa ETsQ-ny paıdalana otyryp, open-almaty.kz portaly arqyly ótinish berýdi nemese front-ofıske kelýdi usynady.
Apta saıyn jaýaptardyń sapasy men merzimin Almaty ákimi Baqytjan Saǵyntaev apparattyq keńeste qaraıdy. Jaýapty oryndaýshylardyń sapaly jáne ýaqytyly jaýap berýin Open Almaty ınspektorlary qadaǵalaıdy. Bul turǵyndardyń qandaı da bir ótinishteri boıynsha oryndaýshy bolyp tabylatyn ákimdiktiń vedomstvolyq qarasty uıymdary qyzmetkerleriniń derbes jaýapkershiligin arttyrýǵa múmkindik beredi.
