Opel Germanııadaǵy eki zaýytynyń jumysyn qysqartady
ASTANA. 24 tamyz. QazAqparat - basshylyǵy Works Council jáne IG Metall kásipodaq uıymdarymen óziniń Germanııadaǵy eki zaýytynda - Rıýsselshaım men Kaızerslaýternde jumys saǵatyn qysqartý jóninde ýaǵdalastyqqa qol jetkizdi, dep habarlady Vedomostı.rý saıty.
Qyrkúıekten bastap jyl sońyna deıin olarda 20 qysqartylǵan jumys kúni engiziledi. Kompanııanyń mundaı qadamǵa barýyna Eýropadaǵy avtonaryqtyń shuǵyl quldyraýy sebep bolyp otyr. Eger 2011 jyldyń birinshi jartysyn esepke almasaq, Opel sońǵy ret 1999 jyly ǵana paıdaǵa shyqqan. Opeldi satý Eýropada birinshi jartyjyldyqta 2011 jyldyń osy kezeńimen salystyrǵanda 15 paıyz qysqardy. Ótken jylǵy eýropalyq operatsııalarda General Motors 747 mln dollar joǵaltqan bolsa, bıylǵy jyldyń birinshi toqsanynyń ózinde 300 mln. dollar shyǵynǵa batyp otyr. Sóıtip, Opel General Motors-tyń zııandy bólinisteriniń biri bolyp otyr.
Jumys saǵattaryn qysqartý jumys oryndaryn saqtap qalýǵa kómektesedi, deıdi kásipodaq basshylary.
Qazir Rıýsselshaımdaǵy zaýytta 14 myńǵa jýyq adam, Kaızerslaýternde - 2500 adam júmys jasaıdy. Germanııada avtoóndirýshiniń tórt zaýyty bar. Onyń biri Bohýmdaǵy zaýytty kompanııa 2016 jylǵa deıin japqaly otyr.
Kásipodaqpen mámilege kelý kompanııanyń jumystan bosatylmaǵan qyzmetkerleri úshin memleketten sýbsıdııa alýyna múmkindik beredi. Germanııada jalaqynyń joǵaltqan 60 paıyzyn memleket óteıtin tártip bar, al otbasynda balalar bolsa, onyń kólemi 67 paıyzǵa deıin jetedi.
Jumys saǵatyn qysqartý toqsan saıyn General Motors-tyń 200-300 mln. dollar únemdeýine múmkindik beredi, deıdi taldamashy Braıan Djonson.
