OPEK+ uıymyna múshe keıbir memleketter munaı óndirý kólemin óz erkimen azaıta bastady

ASTANA. TASS – QazAqparat – OPEK+ kelisimine múshe birneshe memleket mamyr aıynan munaı óndirý kólemin erikti túrde azaıta bastady. Bul protses 2023 jyldyń sońyna deıin jalǵaspaq. Óndiristiń qysqaratyn jalpy kólemi táýligine 1,66 mln bareldi quraıdy.

Bul týraly QazAqparat reseılik TASS agenttigine silteme jasap habarlaıdy.

Munaı óndirýshi alyp Saýd Arabııasyn qosa alǵanda OPEK+ uıymyna múshe keıbir elder 3 sáýir kúni ótken alıanstyń mınıstrlikter monıtorınginde 2023 jyldyń mamyr aıynan bastap, jyl sońyna deıin munaı óndirý kólemin erikti túrde qysqartatyny týraly kenetten málimdeme jasady.

Monıtorıng májilisinen soń OPEK saıtynda jarııalanǵan málimdemede munaı óndirý kólemin qysqartý jónindegi aldyn alý sharasy munaı naryǵynyń turaqtylyǵyn qamtamasyz etýge baǵyttalǵandyǵy aıtylǵan.

Munaı óndirý kólemin qysqartatynyn OPEK+ uıymyna múshe 9 memleket málimdegen. Olardyń ishine Saýd Arabııasy táýligine 500 myń barrelge, Irak – 211 myń, BAÁ – 144 myń, Kýveıt -128 myń, Qazaqstan 78 myń, Aljır - 48 myń, Oman 40 myń, Gabon 8 myń, Reseı 500 myń barrelge qysqartpaq.

Munaı óndirý kólemin erikti túrde qysqartý OPEK+ uıymynyń 2022 jyldyń qarasha aıynan beri qolǵa alynǵan ónimdi táýligine 2 mln berrelge deıin azaıtý týraly josparyn tolyqtyrý sharasy bolmaq.