OPEK tótenshe sammıttiń shaqyrylý múmkindigi jaıly málimdedi

ASTANA. QazAqparat - OPEK tóraǵasy, Nıgerııanyń munaı mınıstri Emmanýel Ibe Kachıkvý munaı baǵasynyń quldyraýyna baılanysty uıym naýryz aıynyń basynda tótenshe sammıt ótkizý múmkindigin qarastyryp otyrǵanyn habarlady.

Mınıstrdiń sózine qaraǵanda, kezekten tys kezdesý ótkizýdi OPEK quramyna kiretin birneshe el suraǵan.

Kezdesýde munaı eksporty boıynsha OPEK saıasatyn ózgertý qajettiligi talqylanady.

Jeltoqsannyń basynda munaıdy eksporttaýshy elder uıymy Venadaǵy sammıt qorytyndysy boıynsha munaı óndirýdi qazirgi deńgeıde qaldyrý sheshimine kelgen bolatyn. Ol uıymnyń resmı kvotasynan kúnine 2 mln barrelge artyq.

Seısenbide azııalyq naryqta munaı baǵasynyń barreli 31 dollardan tómendedi. Brent markili munaı baǵasy 50 tsentke arzandaǵanymen 31 dollar deńgeıinde qaldy. Onyń barreli 31,02 dollar bolyp otyr.