OPEK te, úılesim de bolýy kerek - Qanat Bozymbaev

ASTANA. QazAqparat - Energetıka mınıstri Qanat Bozymbaev Munaı eksporttaýshy elder uıymynyń (OPEK) sheshimderine jáne ol uıymdy qajet etpeıtin elderdiń ustanymyna qatysty pikirin bildirdi, dep habarlaıdy QazAqparat tilshisi. 

«OPEK-ti jabý degen ońaı bolmaıtyn shyǵar. Óıtkeni, munaı óndiretin memleketter ony baıaǵyda qurǵan. Álbette, álem naryǵynda ártúrli pikirtalas bolady. OPEK-ke kirmeıtin elder boıynsha kelesi jyly, bálkim, jańa kelisimge keletin shyǵarmyz. Bul másele munaı salasyndaǵy jalpy úılesim ıdeıasyn paıdalanýǵa múmkindik beredi. Óıtkeni, úılesim bolmasa, kúni erteń óndiris qatty ósip ketse, onda munaı baǵasy tómendeýi múmkin», - dedi Qanat Bozymbaev OKQ-da ótken baspasóz máslıhatynda.

Mınıstrdiń aıtýyna qaraǵanda, osy sebepti úılesim de, OPEK te bolýy kerek.

«Reseı, Meksıka, Ázerbaıjanmen qarym-qatynas qurylyp, úılese jumys atqarylýy tıis. Bizde de osyndaı turaqty rejim ári turaqty baǵa bolýy kerek», - dedi Qanat Bozymbav.

Eske sala ketsek, QR Energetıka mınıstri Qanat Bozymbaev osy aıdyń basynda OPEK+ kelisimine qatysýshy elder mınıstrleriniń 5-shi otyrysyna qatysqan bolatyn.

«Jıyn qorytyndysy boıynsha, munaı óndirisiniń kólemin 6 aıǵa shekteý týraly kelisim jasaldy. Kelisim kúshi 2019 jyldyń qańtar aıynan bastalmaq. Bul sheshim OPEK-ke múshe elderdiń qara altyndy óndirý kólemin táýligine 1,2 mln barrelge nemese árbir el úshin 2-den 2,5%-ǵa deıin tómendetýdi kózdeıdi», - dep habarlaǵan edi Energetıka mınıstrligi.