OPEK+ sońǵy sheshimi Qazaqstannyń munaı óndirý josparyn ózgerte me – mınıstrlik jaýaby
ASTANA. KAZINFORM – 2024 jyldyń aıaǵynda Qazaqstan OPEK+ aıasyndaǵy artyq óndiristi óteý merzimin uzartqany habarlanǵan. Energetıka mınıstrligindegiler Kazinform tilshisine bul sheshim eldiń munaı óndirý naryǵyna qalaı áser etetinin aıtty.
- 2025 jylǵa respýblıka boıynsha munaı óndirý boljamy 96,2 mln tonna dep belgilengen. OPEK+ elderiniń 2024 jyldyń jeltoqsanyndaǵy kezdesýinde kelisimge múshe, mindettemeden artyq munaı óndirgen elderdiń bárine artyq óndirilgen kólemdi óteý kezeńi 2026 jylǵa deıin uzartyldy. Mınıstrlik qazirgi tańda munaı óndirý boljamyn qaıta qaraǵan joq, - dep jazylǵan mınıstrlik jaýabynda.
Resmı málimette 2025 jylǵy 96,2 mln tonna munaı óndirý týraly boljamnyń oryndalýyna túrli faktor áser etetini aıtylǵan.
- Deı turǵanmen, munaı óndirý kólemine ken oryndaryndaǵy jospardan tys kidirister, tehnıkalyq aqaýlar, tabıǵı apattar, aýa raıynyń jaǵdaıy, elektr qýatyn jabdyqtaý kezindegi avarııalar, «Teńiz» jáne basqa da ken oryndaryndaǵy bolashaqqa baǵdarlanǵan jobalardyń qanshalyqty tabysty iske asatyny áser etýi múmkin. Qazaqstan úshin ekonomıkanyń ósimine zııan keltirmeıtin kólemde munaı óndirý boljamy qolaıly lımıt bolyp esepteledi, - dep jazylǵan jaýapta.
Kúni keshe OPEK taratqan habarlamada Reseı men Saýd Arabııasy teń tóraǵalyq etetin OPEK+ alıansynyń Mınıstrlik monıtorıng komıteti qazirgi munaı óndirý saıasatyn ózgertpeý týraly sheshim qabyldaǵany aıtylǵan bolatyn.
Kezdesýge qatysýshylar mámileniń aǵymdaǵy parametrlerine tolyq sáıkestikke qol jetkizýdiń, sondaı-aq munaı óndirýdi qosymsha erikti túrde qysqartý kezeńinde birqatar elde artyq óndirý úshin ótemaqy kestelerin oryndaýdyń mańyzdylyǵyn atap ótti.