OPEK sheshimi qazaqstandyq avtonaryqtyń jumysyn jandandyrýy múmkin

ASTANA. QazAqparat - Qazaqstannyń avtobıznes qaýymdastyǵy munaı naryǵynyń qalpyna kelý keleshegin kólik satýdy, onyń ishinde qazaqstandyq óndiristi yntalandyrýshy faktor retinde qarastyrady, dep habarlaıdy QazAqparat.

Qaýymdastyqtyń ókilderiniń atap ótýinshe, OPEK-tiń munaı óndirý kólemin táýligine 1,2 mln. barrelge tómendetý týraly sheshimi jáne OPEK-ke múshe bolyp sanalmaıtyn elderdiń de qysqartý kelisimin qoldaýy energııa tasymaldaý naryǵyn turaqtandyrýǵa ári Qazaqstandaǵy iskerlik belsendilikke septigin tıgizetin bolady. Bul avtoparkin jańartýǵa, jańa kólik satyp alýǵa daıyn qazaqstandyqtarǵa yqpal etedi. Aıta keterligi, aǵymdaǵy jyly avtomobılderdiń ortasha «jasy» 1,7 jylǵa ósip, 13,66 jyldy qurady. Buǵan deıin ol úzdiksiz tómendep otyrǵan edi. Teńge baǵamy aýytqyǵan kezde Reseıden 312 myń kólik ákelýge baılanysty týyndaǵan «dúrlikpe» kezeńnen keıin qazaqstandyq avtonaryqtyń birtindep turaqtana bastaǵanyna qaramastan ol 2008 jylǵy daǵdarastan keıingi kezeńmen salystyrǵanda óte baıaý qalpyna kelýde.

Esterińizge sala ketsek, taıaýda OPEK músheleri sońǵy 8 jyldan alǵash ret ortaq ymyraǵa kelip, 2017 jyldan bastap munaı óndirý kólemin azaıtýǵa ýaǵdalasqan bolatyn. qol jetkizilgen kelisimge sáıkes, keler jyly 1 táýlikte 32,5 mln. barrelden artyq munaı óndirýge tyıym salynady. Bul qazirgi kórsetkishten 1 mıllıon 200 myń barrelge tómen.