OPEK+ otyrysy qarsańynda munaı baǵasy 3 paıyzǵa qymbattady

AMMAN. QazAqparat – OPEK+ uıymynyń 2020 jyldan beri munaı óndirýdi barynsha qysqartý josparlary aıasynda dúısenbi kúni Azııa naryǵyndaǵy tańerteńgi saýdada munaı baǵasy 3 paıyzdan astam kóterildi, dep habarlaıdy QazAqparat Reuters agenttigine silteme jasap.

Dúısenbide Brent markaly munaı fıýchersteri juma kúni sessııa jabylar aldynda 0,6 paıyzǵa arzandaǵan soń 2,36 dollar nemese 2,8 paıyz qymbattap, barreline 87,50 dollarǵa jetti.

Óz kezeginde AQSh-tyń West Texas Intermediate (WTI) munaıy aldyńǵy sessııada 2,1 paıyzǵa tómendegennen keıin 2,27 dollar nemese 2,9 paıyz qymbattap, barreline 81,76 dollardy quraǵan.

Baǵa ósimi OPEK+ retinde tanymal Munaı eksporttaýshy elder uıymynyń naryqty qoldaý maqsatynda munaı óndirýdi kúnine 1 mln barrelden astam qysqartý josparlary aıasynda boldy.

Uıym mundaı múmkindikti osy sársenbi, 5 qazanda ótetin aldaǵy otyrys qarsańynda qarastyrýda. Mundaı sheshim qabyldansa, bul pandemııa bastalǵannan beri munaı óndirýdiń eń úlken qysqarýy bolmaq.

Osyǵan qaramastan, naryq sarapshylary óndiristiń qysqarýynyń energııamen qamtamasyz etýge áseri jalpy kórsetkishterden aıtarlyqtaı tómen bolady dep esepteıdi, óıtkeni OPEK+ músheleriniń kópshiligi uıymnyń kvotalary ruqsat etkennen áldeqaıda az ónim shyǵaryp otyr.

Arsen Óeshev