OPEK+ otyrysy qarsańynda munaı baǵasy 90 dollarǵa jýyqtady
ASTANA. KAZINFORM — 2 tamyzdaǵy jaǵdaı boıynsha álemdik munaı baǵasy juma kúngi saýda qorytyndysynda qalyptasqan deńgeıde saqtalyp otyr. Álemdik munaı naryǵynyń nazary búginde OPEK+ elderiniń kezdesýine aýyp otyr. Bul týraly Reuters jazdy.
Saýda qorytyndysy boıynsha Brent markaly munaı fıýchersteriniń baǵasy barreline shamamen 90 dollar deńgeıinde jabyldy. Al amerıkalyq WTI munaıy barreline 84-85 dollar aralyǵynda saýdalandy. Shilde aıynda Taıaý Shyǵystaǵy geosaıası shıelenister men munaı jetkizilimine qatysty táýekelderdiń kúsheıýi aıasynda eki munaı markasynyń da baǵasy aıtarlyqtaı ósti.
Naryq qatysýshylarynyń basty nazarynda OPEK+ elderiniń (Qazaqstan, Saýd Arabııasy, Reseı, Irak, Kýveıt, Aljır jáne Oman) 2 tamyzdaǵy kezdesýi tur. Sarapshylardyń boljamynsha, alıans qyrkúıek aıynda munaı óndirý kólemin táýligine qosymsha 188 myń barrelge arttyrýdy maquldaýy múmkin. Osydan keıin óndiris kólemin ulǵaıtý qazan aıynan bastap ýaqytsha toqtatylýy yqtımal.
Munaı baǵasynyń joǵary deńgeıde saqtalýyna Ormýz buǵazy men Qyzyl teńiz arqyly júk tasymalynyń shektelýi jáne jetkizilimderdegi irkilister yqpal etip otyr. Sarapshylardyń pikirinshe, OPEK+ óndirý kólemin arttyrǵan kúnniń ózinde, qosymsha munaıdyń bir bóligi logıstıkalyq qıyndyqtarǵa baılanysty álemdik naryqqa der kezinde jetpeýi múmkin. Sondyqtan bul sheshim baǵanyń kúrt tómendeýine birden áser ete qoımaıdy.
Eske salaıyq, buǵan deıin Qazaqstan, Saýd Arabııasy, Reseı, Irak, Kýveıt, Aljır jáne Oman 2026 jylǵy tamyzdan bastap munaı óndirý kólemin táýligine 188 myń barrelge ulǵaıtý týraly sheshim qabyldaǵanyn jazǵanbyz.
