OPEK+ munaı kólemin naryqqa kezeń-kezeńimen qaıtarýdyń kestesine túzetý engizedi

ASTANA. KAZINFORM – Búgin OPEK+ Birlesken mınıstrlik monıtorıng komıtetiniń (JMMC) 59-shy otyrysy beınekonferentsııa formatynda ótti. Otyrysqa Qazaqstan atynan qatysqan Energetıka mınıstri Erlan Aqkenjenov resmı Astana OPEK+ aıasyndaǵy kelisimderdi ustana beretinin málim etti.

Komıtet otyrysynda OPEK+ kelisimine qatysatyn elderdiń 2025 jyldyń qańtar-aqpan aılarynda óz mindettemelerin oryndaý kórsetkishteri qarastyrylyp, jahandyq munaı naryǵyndaǵy qazirgi úrdister talqylandy.

— Komıtet munaı eksporttaýshy segiz eldiń naryq turaqtylyǵyn qoldaý úshin óndiris kólemin erikti túrde qysqartqanyn joǵary baǵalap, barlyq mindettemelerdi tolyq oryndaý úshin ótemaqy júrgizýdiń asa mańyzdy ekenin atap ótti.

Qazaqstan delegatsııasy OPEK+ aıasyndaǵy 3 sáýirde ótken kezdesýge de qatysty. Bul jıynda erikti qysqartýǵa ún qosqan segiz memleket, onyń ishinde Qazaqstan da, naryq jaǵdaıyna birlesken baǵalaý júrgizdi. 3 sáýirdegi kezdesý qorytyndysy boıynsha munaı kólemin naryqqa kezeń-kezeńimen qaıtarýdyń buryn kelisilgen kestesine túzetý engizý týraly sheshim qabyldandy.

Qazaqstan OPEK+ aıasyndaǵy kelisimderdi ustanýdy jalǵastyryp, halyqaralyq mindettemeler men ulttyq múddelerdi basshylyqqa ala otyryp, alıans seriktesterimen syndarly ózara is-qımyldy jalǵastyrady, - dep jazylǵan mınıstrliktiń resmı málimdemesinde.

Eske salsaq, bir aı buryn OPEK+ elderi sáýirden bastap munaı óndirý kólemin arttyrýǵa ýaǵdalasqan bolatyn.