OPEK mindettemelerin oryndaý-oryndamaý óz erkimizde – «QazMunaıGaz» basshysy
ASTANA. KAZINFORM – OPEK mindettemelerin oryndaý-oryndamaý Qazaqstannyń óz erkinde. Bul týraly Jibek Joly telearnasynyń «Ýáde» baǵdarlamasyna eksklıýzıvti suhbat bergen «QazMunaıGaz» UK» AQ basqarma tóraǵasy Ashat Hasenov aıtty.

- Birinshiden, eger OPEK-ti, onyń munaı kólemin alyp qarasaq, ondaǵy bizdiń úlesimiz salystyrmaly túrde alǵanda az. Ekinshiden, OPEK-tiń qandaı múshesimiz? Muny eshkim aıtpaıdy. Biz - baqylaýshymyz. ıAǵnı, mindettemelerdi oryndaý-oryndamaý óz erkimizde. OPEK-ke múshe retinde kirmedik. Munaı baǵasyna ásir etý maqsatynda talaptaryn oryndaýǵa tyrysamyz. Biraq, meniń jeke pikirim, ol mindetteme emes. Biz ózimizdiń jaǵdaıymyzǵa qaraýymyz qajet, - dedi Ashat Hasenov.

Ulttyq kompanııa basshysynyń dereginshe, elimiz jyl saıyn shamamen 90 mln tonnaǵa jýyq munaı óndiredi. Onyń 56 mln tonnasy Kaspıı qubyr konsortsıýmy arqyly eksportqa shyǵarylady. Munan bólek, Baký-Tıbılısı-Djeıhan, «Dostyq» qubyrlary arqyly da syrtqy naryqtarǵa jóneltiledi. Al ishki naryqqa 17 mln tonna munaı tıesili. Sonymen qatar ol Memleket basshysy tarapynan munaı-gaz hımııa salasyn damytýǵa qatysty naqty tapsyrma bolǵanyn atap ótti.
- Eger munaı-gaz hımııa zaýyty salynsa, onda onyń mýltıplıkatıvti áseri qosymsha salalarda 6-7 jumys ornyn ashýǵa múmkindik beredi. Ony jeńil túsindirýge bolady. Qazir gazdan polıpropılen alamyz. Polıpropılennen kóptegen basqa taýar shyǵarylady. Shymkentte «Bal tekstıl» kilem zaýyty bar. Olar ónimderin polıpropılennen toqıdy. ıAǵnı, tizbek ulǵaıǵan saıyn jańa jumys oryndary ashylyp, ekonomıkalyq áseri úlken bolady, - dedi ol.
Qazaqstannyń dáleldenbegen munaı qorynyń kólemi qansha ekenin jazǵan bolatynbyz.