OPEK qory Qazaqstanǵa grant bólip, tehnıkalyq qoldaý kórsetýge daıyn
ASTANA. KAZINFORM — Astanada Qazaqstan Respýblıkasynyń Energetıka mınıstri Almasadam Sátqalıev OPEK halyqaralyq damý qorynyń prezıdenti Abdýlhamıd Alhalıfamen kezdesti.
Kelissóz barysynda taraptar yntymaqtastyqty damytýdyń negizgi baǵyttary men OPEK Qorynyń qoldaýymen ınvestıtsııalyq jobalardy iske asyrý múmkindikterin talqylady.
Qor prezıdenti uıymnyń tehnıkalyq qoldaý da, grant ta usynýǵa daıyn ekenin atap ótti, sondaı-aq Ortalyq Azııa elderinde júzege asyp jatqan aǵymdaǵy jobalar týraly aıtty.
Energetıka mınıstri óz kezeginde 2060 jylǵa qaraı kómirtegi beıtaraptyǵyna qol jetkizý jónindegi ulttyq maqsattarǵa sáıkes keletin Qazaqstanda jańartylatyn energııa kózderi obektilerin salý jobalary jóninde habarlady.
Ol sondaı-aq ınvestıtsııany qorǵaý úshin erekshe jaǵdaılardy, sondaı-aq óndiristi oqshaýlaý jáne geologııalyq barlaý salalaryndaǵy ınvestorlar úshin turaqty fıskaldyq jáne retteýshi preferentsııalardy usynýdyń mańyzyn atap ótti.
Kezdesý qorytyndysy boıynsha taraptar «jasyl» energetıka salasyndaǵy birlesken ınvestıtsııalyq jobalardy iske asyrý múmkindikterin zerdeleýdi, sondaı-aq «taza» kómir tehnologııasyn damytý perspektıvalaryn qaraýdy jalǵastyrýǵa kelisti.
OPEK halyqaralyq damý qoryn 1976 jyly OPEK-ke múshe memleketter qurdy. Qor damýshy elderdiń ekonomıkalyq damýyna yqpal etetin halyqaralyq damý qarjy ınstıtýty bolyp tabylady.
Qorǵa 12 memleket múshe: Aljır, Venesýela, Gabon, Indonezııa, Iran, Irak, Kýveıt, Lıvııa, Nıgerııa, Saýd Arabııasy, BAÁ jáne Ekvador.
