OPEK konferentsııasy munaı baǵasynyń kúrt kóterilýine sebep boldy
ASTANA. 9 maýsym. QazAqparat - 8 maýsymda Venada ótken kezdesýde OPEK elderiniń ókilderi munaı óndirý kvotasy boıynsha ortaq kelisimge kele almaýynyń saldarynan,
Nıý-Iork jáne London bırjalarynda «qara altynnyń» baǵasy taǵy kóterilip ketti.
"Keshegi saýdanyń qorytyndysy boıynsha Nıý-Iork bırjasynda Light Sweet markaly munaıdyń baǵasy 1,65 dollarǵa qymbattap, 100,74 dollar/barreldi qurady", - dep habarlaıdy RBK agenttigi.
Al London bırjasynda Brent munaıynyń baǵasy 1,07 dollarǵa kóterilip, «qara altynnyń» barreliniń baǵasy 117,85 dollarǵa jetti.
AQSh Prezıdenti Barak Obama, qajet bolǵan jaǵdaıda, eldiń strategııalyq munaı qorynyń paıdalanylý múmkindigin joqqa shyǵarmaıtynyn málimdep otyr.
OPEK elderi álemdegi barlyq munaı qorynyń shamamen 40 paıyzyn óndiredi. Venadaǵy otyrysta «qara altynnyń» táýliktik óndirisin, aǵymdaǵy jyldyń ekinshi jartysyndaǵy kútilip otyrǵan suranysty eskere otyryp, 30,3 mıllıon barrelge deıin kóterý týraly usynys jasaldy. Biraq bul usynysqa qartelge múshe alty el qarsy boldy.
Kvotany kóterýdi qoldap otyrǵan Saýd Arabııasynyń munaı mınıstri Álı ál-Naımı, «OPEK-tiń bul konferentsııasy kartel tarıhyndaǵy eń nátıjesiz konferentsııa» dep atady.
