OPEK+ qyrkúıekten bastap munaı óndirý kólemin arttyrý týraly kelisimge keldi
ASTANA. KAZINFORM — Qazaqstan, Saýd Arabııasy jáne Reseı sııaqty jeti OPEK+ eli 2026 jyldyń qyrkúıeginen bastap munaı óndirý kólemin táýligine 188 myń barrelge arttyrýǵa kelisti. Bul sheshim álemdik munaı naryǵyndaǵy turaqtylyqty saqtaý maqsatynda qabyldandy. Bul týraly OPEK baspasóz qyzmeti málimdedi.
Tıisti sheshim búgin, 2 tamyzda Saýd Arabııasy, Reseı, Irak, Kýveıt, Qazaqstan, Aljır jáne Oman ókilderiniń vırtýaldy kezdesýi barysynda qabyldandy. Jıynda álemdik munaı naryǵyndaǵy qazirgi jaǵdaı men onyń damý perspektıvalary talqylandy.
Málimdemede atap ótilgendeı, munaı óndirý kólemin arttyrý 2023 jyldyń sáýirinde jarııalanǵan qosymsha erikti túzetýler aıasynda júzege asyrylady. Kezdesýge qatysýshylardyń pikirinshe, bul qadam álemdik munaı naryǵyndaǵy turaqtylyqty saqtaýǵa múmkindik beredi.
Sonymen qatar elder bul sheshim buryn óndiris kólemin belgilengen deńgeıden asyryp jiberý saldaryn óteý boıynsha mindettemelerdi oryndaýdy jedeldetýge múmkindik beretinin atap ótti.
Kezdesýge qatysýshylar OPEK+ yntymaqtastyq týraly deklaratsııasyn oryndaýǵa beıildiligin rastady. Onyń ishinde munaı óndirýdi qosymsha erikti túrde shekteý sharalary da bar. Bul talaptardyń oryndalýyn Birlesken mınıstrlik monıtorıng komıteti (JMMC) baqylaıdy. Sondaı-aq elder 2024 jyldyń qańtarynan beri oryn alǵan artyq óndiris kólemin tolyq óteýge nıetti ekenin taǵy da málimdedi.
Budan bólek, JMMC Birlesken mınıstrlik monıtorıng komıtetiniń 67-otyrysynda Saýd Arabııasy, Reseı, Irak, Kýveıt, Qazaqstan, Nıgerııa, Aljır jáne Venesýela ókilderi álemdik munaı naryǵyndaǵy jaǵdaıdy talqylady. Olar jahandyq energetıkalyq naryqtardyń turaqtylyǵyn qamtamasyz etýge baǵyttalǵan yntymaqtastyq týraly deklaratsııany (DoC) oryndaýǵa beıildi ekenin rastady.
Komıtet energııa tasymaldaýshylardyń úzdiksiz jetkizilýi úshin halyqaralyq teńiz baǵyttarynyń qaýipsizdigin qamtamasyz etýdiń mańyzdylyǵyn atap ótti. Sonymen qatar qatysýshylar energetıkalyq ınfraqurylymǵa jasalǵan shabýyldarǵa alańdaýshylyq bildirdi. Olardyń aıtýynsha, búlingen nysandardy qalpyna keltirý kóp qarjy men ýaqytty qajet etedi, bul jetkizý kólemine keri áser etip, naryqtaǵy qubylmalylyqty kúsheıtýi múmkin.
OPEK±ke múshe jeti eldiń munaı naryǵyndaǵy jaǵdaıdy baǵalaýǵa arnalǵan kelesi kezdesýi 2026 jyldyń 6 qyrkúıegine josparlanǵan.
Eske salaıyq, buǵan deıin OPEK+ otyrysy qarsańynda munaı baǵasy 90 dollarǵa jýyqtaǵanyn jazǵan edik.
Onyń aldynda Qazaqstan OPEK+ elderimen birge tamyzda munaı óndirý kólemin arttyratynyn habarlaǵanbyz.
