Energetıka mınıstri qańtarda munaı óndirý kóleminiń ulǵaıýyn túsindirdi
ASTANA. KAZINFORM — Almasadam Sátqalıev qańtar aıynda Qazaqstanda munaı óndirýdi ulǵaıtýǵa qatysty tehnıkalyq túsinikteme berdi, dep málimdedi Energetıka mınıstrligi.
Qazaqstan Respýblıkasynyń Energetıka mınıstri Almasadam Sátqalıev Saýd Arabııasy Koroldiginiń energetıka mınıstri jáne OPEK+ tóraǵasy, mártebeli hanzada Abdýlazız ben Salmanmen jáne Reseı Federatsııasy Premer-Mınıstriniń orynbasary jáne OPEK+ teń tóraǵasy Aleksandr Novakpen, sondaı-aq OPEK Bas hatshysy Haıtam Ál-Gaıspen telefon arqyly kelissózder júrgizdi.
Talqylaý barysynda Almasadam Sátqalıev qańtar aıynda Qazaqstanda munaı óndirýdi ulǵaıtýǵa qatysty tehnıkalyq túsinikteme berdi.
— Mınıstr bul ósim Bolashaq keńeıtý jobasy sheńberinde Teńiz munaı ken ornyndaǵy jańa úshinshi býyn zaýytynda munaı óndirýdiń bastalýymen baılanysty ekenin atap ótti. Energetıka mınıstri buǵan deıin óndiristi ulǵaıtý 2025 jyldyń maýsym-shilde aılarynda bastalady dep josparlanǵanyn túsindirdi. Almasadam Sátqalıev sondaı-aq óndiristiń ulǵaıýy ken ornyna tehnıkalyq qyzmet kórsetýden jáne Teńiz ken ornynda jańa qaıta óńdeý qondyrǵysyn paıdalanýǵa bergennen keıin júrgizilgen ýaqytsha birjolǵy testileýdiń nátıjesi bolǵanyn aıtty. Sátqalıev ótemaqy tetigin qosa alǵanda, Qazaqstan OPEK+ kelisimi sheńberinde óz mindettemelerin áli de tolyq ustanatynyn rastady. Qazaqstan Qańtar aıyndaǵy asyp ketýdiń ornyn toltyrý úshin basqa munaı ken oryndarynda óndirýdi qysqartýdy qosa alǵanda, óz mindettemelerin oryndaý boıynsha odan ári sharalar qabyldaıdy, — delingen mınıstrlik taratqan aqparatta.
Mınıstr sondaı-aq Qazaqstan qańtar aıynda ótemaqynyń artyq óndirilýin de, oryndalmaǵan kólemin de eskeretin jańartylǵan ótemaqy josparyn usynatynyn aıtty.
Tóraǵa men teń tóraǵa OPEK+ kelisimine sáıkes mindettemeler men ótemaqyny tolyq oryndaýdyń mańyzdylyǵyn rastady jáne naryqtyń turaqtylyǵyn saqtaý maqsatynda OPEK+ birneshe elderiniń erikti qysqartýlary men kúsh-jigeriniń rólin atap ótti.
Budan buryn 2024 jyldyń aıaǵynda Qazaqstan OPEK+ aıasyndaǵy artyq óndiristi óteý merzimin uzartqany habarlanǵan. Energetıka mınıstrligindegiler Kazinform tilshisine bul sheshim eldiń munaı óndirý naryǵyna qalaı áser etetinin aıtty.