OPEK+ kelesi otyrysy qashan ótedi

ASTANA. KAZINFORM — OPEK+ uıymynyń segiz jetekshi eli qazan aıymen salystyrǵanda munaı óndirý kólemin táýligine 137 myń barrelge arttyrý týraly sheshim qabyldady, dep habarlaıdy TASS.

Málimdemede bul sheshimniń álemdik ekonomıkanyń turaqty keleshegi men naryqtaǵy oń irgeli kórsetkishterge baılanysty qabyldanǵany atap ótiledi. Atap aıtqanda, álemdik munaı qorynyń tómen deńgeıi naryqtaǵy tepe-teńdiktiń saqtalyp otyrǵanyn kórsetedi.

OPEK elderi naryq jaǵdaıyn únemi baǵalap otyratynyn jáne qajet bolǵan jaǵdaıda óndirýdiń josparly ósimin toqtatý nemese qaıta qaraý múmkin ekenin málimdedi.

OPEK derekterine sáıkes, qarasha aıynda:

Reseı men Saýd Arabııasy óndiristi táýligine 41 myń barrelge,

Irak — 18 myń barrelge,

BAÁ — 12 myń barrelge,

Kýveıt — 10 myń barrelge,

Qazaqstan — 7 myń barrelge,

Oman — 4 myń barrelge,

Aljır — 4 myń barrelge arttyra alady.

Nátıjesinde elderdiń jańa óndiris kvotalary kelesideı belgilendi:

Reseı — 9,532 mln barrel/táýlik,

Saýd Arabııasy — 10,061 mln barrel/táýlik,

Irak — 4,255 mln barrel/táýlik,

Kýveıt — 2,569 mln barrel/táýlik,

BAÁ — 3,399 mln barrel/táýlik,

Qazaqstan — 1,563 mln barrel/táýlik,

Oman — 808 myń barrel/táýlik,

Aljır — 967 myń barrel/táýlik.

TASS agenttiginiń esebi boıynsha, keıbir elderdiń burynǵy kezeńdegi artyq óndirýin óteý kestesin eskere otyryp, qarasha aıynda naqty óndiris ósimi shamamen táýligine 74 myń barrel.

Kelesi OPEK+ «segizdik» kezdesýi 2025 jylǵy 2 qarashada ótedi. 

Aıta ketelik OPEK+ negizgi músheleri munaı óndirýdi ulǵaıtýǵa kelisken edi.