OPEK+ elderi óndiris deńgeıin ulǵaıtýdy jalǵastyrýǵa kelisti
NUR-SULTAN. QazAqparat - OPEK+ elderiniń aǵymdaǵy óndirý deńgeıin shildede táýligine 0,648 mln barrelge ulǵaıtýdy jalǵastyrý qajet. Bul týraly búgin OPEK+ kelisimine qatysýshy elderdiń beınekonferentsııa formatynda ótken otyrysynda aıtyldy, dep habarlaıdy QazAqparat QR Energetıka mınıstrliginiń baspasóz qyzmetine silteme jasap.
Otyrys barysynda sáýir aıynda elderdiń kelisim boıynsha mindettemelerin oryndaýy talqylandy. Oǵan Qazaqstan atynan energetıka vıtse-mınıstri Áset Maǵaýov qatysty.
«Otyrys qorytyndysy boıynsha OPEK+ elderiniń aǵymdaǵy óndirý deńgeıin shilde aıynda táýligine 0,648 mln barrelge ulǵaıtýdy jalǵastyrý jáne artyq óndirý ótemaqysy kezeńin 2022 jylǵy jeltoqsanǵa deıin uzartý týraly sheshim qabyldandy», - delingen mınıstrlik málimdemesinde.
Buǵan deıin habarlanǵanyndaı, Qazaqstan OPEK+ kelisimi boıynsha táýligine 1,655 mln barrel munaı óndirmek.
