OPEK+ elderi munaı óndirýdi azaıtý kelisimin 2024 jyldyń sońyna deıin uzartady

ASTANA. QazAqparat - OPEK + kelisimine qatysýshy elder munaı óndirýge qoıylǵan shekteýdi 2024 jyldyń sońyna deıin uzartýǵa kelisti. Óndiristiń jalpy kólemi táýligine 40 mıllıon barrelden sál asady, bul qazirgiden 1,4 mıllıon barrelge az, dep habarlaıdy QazAqparat Euronews-ke silteme jasap.

OPEK+ elderi Venada ótken kezdesýde tómendep bara jatqan energııa baǵasyn qoldaý úshin munaı óndirýge shekteýdi kelesi jyldyń sońyna deıin uzartýǵa kelisti.

2024 jyldyń 1 qańtary men 31 jeltoqsany aralyǵynda kelisim elderindegi munaı óndirýdiń jalpy kólemi - táýligine 40,46 mıllıon barrel. Bul qazirgiden 1,4 mıllıonǵa az.

Ár eldiń óz kvotasy belgilengen. Reseı úshin bul táýligine 9,828 mıllıon barrel, Saýd Arabııasy úshin — 10,478 mıllıon.

Máskeý jáne Er-Rııad - OPEK + qatysýshylary arasyndaǵy eń iri munaı eksporttaýshylar.

Angola men Gabon delegattary kezdesý kezinde uıymnyń shtab-páterinen shyǵyp ketken.

The Wall Street Journal habarlaýynsha, is júzindegi odaq jetekshisi - Saýd Arabııasy Afrıkanyń shaǵyn elderiniń munaı óndirý kvotasyn azaıtýǵa shaqyrǵan.