OPEK+ elderi munaı óndirisin táýligine 2 mln barrelge azaıtady

VENA. QazAqparat – OPEK+ elderi bıylǵy qarasha aıynan bastap munaı óndirisin táýligine 2 mln barrelge azaıtýǵa kelisti, dep habarlaıdy QazAqparat QR Energetıka mınıstrligine silteme jasap.

5 qazanda Vena qalasynda (Avstrııa) OPEK+ kelisimine qatysýshy elderdiń mınıstrlik otyrysy ótti. Oǵan QR Energetıka mınıstri Bolat Aqsholaqov qatysty.

Otyrys barysynda elderdiń tamyz aıynda Kelisim mindettemelerin oryndaýy talqylandy. Kelisimdi 2023 jylǵy 31 jeltoqsanǵa deıin uzartý týraly sheshim qabyldandy.

Sondaı-aq qatysýshy elder osy jyldyń qarasha aıynan bastap munaı óndirisin (2022 jyldyń tamyz aıynyń deńgeıinen) táýligine 2 mln barrelge azaıtýǵa kelisti.

Budan bólek, OPEK+ elderiniń 19-shy keńesinde maquldanǵan bazalyq deńgeı bekitildi.

Monıtorıng komıtetiniń otyrysyn – ár eki aı saıyn, mınıstrlik kezdesýin ár 6 aı saıyn ótkizý sheshimi qabyldandy. Artyq óndiristi óteý merzimi 2023 jyldyń 31 naýryzyna deıin uzartyldy.

«Qazaqstan úshin qarashaǵa arnalǵan mindettemeler táýligine 1,628 mln barreldi quraıdy.

Elder Kelisim sheńberinde elderdiń mindettemelerdi saqtaýynyń mańyzdylyǵy týraly taǵy da kelisti», - delingen QR Energetıka mınıstrliginiń málimetinde.

Foto: QR Energetıka mınıstrligi