OPEK+ elderi munaı óndirisin azaıtýǵa kelisti

LONDON. QazAqparat - OPEK+ elderi munaı óndirýdi táýligine 9,7 mln barrelge qysqartýǵa kelisti. Bul jónindegi kelissózder 10 saǵatqa sozylyp, beısenbiden jumaǵa deıin jalǵasty. Tarıhı mámilege taqtatas revolıýtsııasynyń arqasynda álemdegi eń iri munaı óndirýshilerdiń birine aınalǵan AQSh eli alǵash ret qosyldy, dep habarlaıdy QazAqparat VVS-ge silteme jasap.

«2020 jyldyń 1 mamyrynan bastap OPEK+ múshe elder munaı óndirýdi táýligine shamamen 10 mln barrelge tómendetý boıynsha tarıhı mámile jasaǵany týraly habarlaımyz», - dep jazdy Kýveıttiń munaı mınıstri Haled al-Fadyl Twitterdegi paraqshasynda.

Beısenbi kúngi kelissózder barysynda óndiristi qysqartý jóninde Saýd Arabııasy men Reseı kelisti.

Bul elderdiń árqaısysy munaı óndirýdi 2020 jyldyń mamyr jáne maýsym aılarynda táýligine 2,5 mln barrelge azaıtady. Keıin shekteýler birtindep álsireýi tıis.

Degenmen, beısenbi kúni kelisim jasalmady. Sebebi Meksıkaǵa óndiristi táýligine 400 myń barrelge azaıtý usynyldy. Al bul el munaı óndirisin kúnine 100 myń barrelge ǵana qysqartýǵa daıyn edi. Kelissózge AQSh prezıdenti Donald Tramp aralasyp, AQSh óndiristi táýligine 250 myń barrelge azaıtatynyn málimdedi. Bul, Meksıka pozıtsııasynyń ornyn toltyrýy tıis.

Munaı óndirýshi elder jańa qysqartýlar esebinen qara altyn baǵasyn kúrt ósirýge úmitti. Kelissózder koronavırýs pandemııasyna baılanysty telekonferentsııa rejıminde qashyqtan ótti.

Bul kelisim munaı óndirýshi elder arasyndaǵy kóptegen aıǵa jalǵasqan kelispeýshilikterdi toqtatýy tıis. Naýryzdyń basynda olar OPEK+ aıasynda óndiristi qysqartý týraly kelisimge kele almady, saldarynan shıkizat baǵasy kúrt tómendegen bolatyn.

Buǵan deıin habarlaǵanymyzdaı, Qazaqstan óz kezeginde OPEK+ kelisimine qatysty konsensýsty qoldady.

«OPEK+ múshe jáne múshe emes memleketterdiń mınıstrler vebınary nátıjesinde munaı óndirý kólemin 1 mamyrdan bastap, eki aıǵa táýligine 9,7 mln barrelge qysqartý jóninde kelisimge qol qoıyldy», - delingen QR Energetıka mınıstrliginiń málimetinde.