OPEK elderi shildede munaı óndirýdi táýligine 1,66 mln barrelge arttyrdy
ASTANA. KAZINFORM – Munaı eksporttaýshy elder uıymyna (OPEK) múshe memleketterdiń shıki munaı óndirý kólemi shildede aldyńǵy aımen salystyrǵanda táýligine 1 mln 659 myń barrelge artyp, 23 mln 632 myń barrelge jetti, dep habarlaıdy Anadolý.
OPEK-tiń munaı naryǵy týraly aı saıynǵy esebine sáıkes, ótken aıda óndiris kóleminiń eń joǵary ósimi Irakta tirkeldi. Eldegi munaı óndirisi táýligine 665 myń barrelge artyp, 2 mln 621 myń barrelge jetti.
Odan keıin Saýd Arabııasy tur. Bul elde óndiris táýligine 590 myń barrelge ósip, 7 mln 352 myń barrel boldy. Kýveıtte kórsetkish 393 myń barrelge artyp, táýligine 1 mln 845 myń barrelge jetti.
Al munaı óndirisi eń kóp tómendegen elder – Nıgerııa men Birikken Arab Ámirlikteri (BAÁ). Nıgerııada táýliktik óndiris 37 myń barrelge azaıyp, 1 mln 546 myń barreldi qurady. BAÁ-de óndiris 30 myń barrelge tómendep, 3 mln 780 myń barrel boldy.
Osylaısha, OPEK elderiniń shildedegi shıki munaı óndirisi aldyńǵy aımen salystyrǵanda táýligine 1 mln 659 myń barrelge ósip, 23 mln 632 myń barrelge jetti.
Sonymen qatar OPEK elderi men uıymǵa kirmeıtin birqatar munaı óndirýshi memleketterden quralǵan «OPEK+» tobynyń jalpy táýliktik munaı óndirisi osy kezeńde 1 mln 424 myń barrelge artyp, 37 mln 655 myń barreldi qurady.
OPEK bıylǵy munaı suranysy boıynsha boljamyn tómendetti
OPEK bıyl álemdik munaı suranysynyń ósýine qatysty boljamyn tómendetip, keler jylǵa arnalǵan boljamyn kerisinshe joǵarylatty.
Uıymnyń esebine sáıkes, bıyl álemdik munaı suranysy byltyrmen salystyrǵanda táýligine shamamen 580 myń barrelge artyp, 105 mln 740 myń barrelge jetedi dep kútiledi.
Ekonomıkalyq yntymaqtastyq jáne damý uıymyna (EYDU) kirmeıtin elderde bıyl munaıǵa suranys táýligine 610 myń barrelge ósip, 59 mln 820 myń barrelge jetedi dep boljanyp otyr.
Al EYDU elderinde suranys táýligine 40 myń barrelge azaıyp, 45 mln 910 myń barrel bolady dep kútiledi.
Keler jyly álemdik munaı suranysy bıylǵy kórsetkishpen salystyrǵanda táýligine 2 mln 160 myń barrelge ósip, 107 mln 900 myń barrelge jetedi degen boljam bar.
Aıta keteıik, AQSh álemdik munaı baǵasy ósedi dep boljap otyr.
