OPEC+ elderi munaı naryǵynyń turaqtylyǵyn saqtaý jónindegi ustanymyn rastady
ASTANA. KAZINFORM - Jahandyq munaı naryǵynyń ahýaly men keleshegin talqylaý maqsatynda Saýd Arabııasy, Reseı, Irak, Birikken Arab Ámirlikteri, Kýveıt, Qazaqstan, Aljır jáne Oman elderi onlaın formatta kezdesý ótkizdi.
Bul segiz memleket buǵan deıin 2023 jylǵy sáýir men qarasha aılarynda qosymsha erikti óndiris túzetýlerin engizgen bolatyn.
– Jahandyq ekonomıkanyń turaqty damý qarqyny men munaı naryǵyndaǵy qazirgi oń kórsetkishterdi, sonyń ishinde tómen qor deńgeıin eskere otyryp, 2023 jylǵy sáýirde jarııalanǵan táýligine 1,65 mln barrel kólemindegi qosymsha erikti túzetýdiń aıasynda óndiris kólemin 137 myń barrelge qysqartý týraly sheshim qabyldandy. Bul túzetý 2025 jylǵy jeltoqsannan bastap júzege asyrylady, – delingen habarlamada.
Sonymen qatar maýsymdyq faktorlarǵa baılanysty atalǵan segiz memleket 2026 jyldyń qańtar, aqpan jáne naýryz aılarynda óndiris kólemin ulǵaıtýdy ýaqytsha toqtatýǵa kelisti.
– Táýligine 1,65 mln barrelge deıingi óndiris kólemi naryqtaǵy jaǵdaıǵa qaraı ishinara nemese tolyq qalpyna keltirilýi múmkin. Elder naryq konıýnktýrasyn muqııat baqylap, turaqtylyqty qamtamasyz etý úshin saq jáne ıkemdi saıasat ustanýdy jalǵastyrady, - dep atap ótilgen málimdemede.
Sondaı-aq qatysýshy elder 2023 jylǵy qarashada jarııalanǵan táýligine 2,2 mln barrel kólemindegi burynǵy erikti túzetýlerge qatysty qajet bolǵan jaǵdaıda toqtatý nemese qaıta qaraý múmkindigin saqtaıtynyn jetkizdi. Oǵan qosa atalǵan segiz memleket 2024 jylǵy qańtardan beri artyq óndirilgen munaı kólemin tolyq óteıtinin jáne naryqtaǵy jaǵdaıdy, kelisimderdiń oryndalýyn aı saıynǵy kezdesýlerde qarastyratynyn málimdedi. Kelesi kezdesý 2025 jylǵy 30 qarashada ótedi delingen qujatta.
Buǵan deıin OPEK+ uıymynyń segiz jetekshi eli qazan aıymen salystyrǵanda munaı óndirý kólemin táýligine 137 myń barrelge arttyrý týraly sheshim qabyldaǵanyn jazǵanbyz.
Sonymen qatar Qasym-Jomart Toqaev pen Haıtam ál-Gaıs álemdik munaı naryǵynyń qazirgi jaǵdaıy men yntymaqtastyqtyń ózekti máselelerin talqylaǵan edi.