Op-ońaı qaǵıdat: Bektenov aqshaǵa alynatyn materıaldar men taýarlardyń otandyq bolýy jaıynda
ASTANA. KAZINFORM – Qazaqstanda óndiriletin qandaı da bir taýardy ımporttaý memleket múddesine qaıshy keletin áreket. Bul týraly Úkimet otyrysynda Premer-mınıstr Oljas Bektenov aıtty.
- Ónerkásip jáne Energetıka mınıstrlikteri jer qoınaýyn paıdalanýshylarmen birlesip, qazaqstandyq kásiporyndardan satyp alýdy qamtamasyz etý úshin taýarlar tizbesi men olardyń kólemderin aıqyndasyn. Sondaı-aq «Atameken» ulttyq palatasymen, múddeli memlekettik organdarmen jáne kompanııalarmen birlesip, jyl sońyna deıin ımportty almastyratyn ónimderge qatysty satyp alýdyń barlyq túri boıynsha 2027 jylǵa arnalǵan uzaqmerzimdi sharttar men ofteık-kelisimsharttar josparyn bekitý qajet, - dedi Úkimet basshysy.
Premer-mınıstr Ónerkásip mınıstrligine Jasandy ıntellekt mınıstrligimen birlesip, úsh aı ishinde Qazaqstandyq taýar óndirýshiler tizilimine engizý rásimin ótinimderdi qaraý merzimderin belgileı otyryp, memlekettik kórsetiletin qyzmet formatyna aýystyrýdy tapsyrdy.
- Kólik mınıstrligi múddeli memlekettik organdarmen birlesip, halyqaralyq tasymaldar úshin otandyq júk tehnıkasyna suranysty yntalandyrý, onyń ishinde jeńildikpen lızıngti keńeıtý jóninde sharalar qabyldasyn, - dedi ol.
Budan bólek, Úkimet basshysy Ónerkásip mınıstrligine ımportty almastyrýdy damytý boıynsha basym baǵyttardy aıqyndap, olardy Qazaqstanda lokalızatsııalaý sharalaryn ázirleýdi júktedi.
- Jalpy qarapaıym sózben aıtatyn bolsaq, biz bıýdjetten qarajat bólsek, ony ıgeretin kompanııa qazaqstandyq bolýy kerek, olar aqshaǵa satyp alynatyn materıaldar, taýarlar qazaqstandyq bolýy kerek. Op-ońaı qaǵıdat. Ony bárimiz ustanýymyz kerek. Al eger Qazaqstanda qandaı da bir taýar óndiriletin bolsa, biz ony satyp almaı, ımporttap alyp keletin bolsaq, ol memleket múddesine qaıshy keletin áreket. Ony úzildi-kesildi dep aıtý kerek. Úkimet múshelerine jáne óńir basshylaryna aıtatynym, eskerińizder, - dedi Oljas Betkenov.
Sonymen qatar Oljas Bektenov «Halyqtyq qurylys» baǵdarlamasynda otandyq ónimge basymdyq berýdi tapsyrdy.