Onjyldyq merzimdi qamtıtyn tilderdi damytý baǵdarlamasy qazaq tildi BAQ-tardaǵy qazaq tildi kontentti ulǵaıtýǵa baǵyttalǵan
ASTANA. Shildeniń 26-sy. QazAqparat /Marlan Jıembaı/ - 2020 jylǵa deıingi merzimdi qamtıtyn tilderdi damytýdyń baǵdarlamasynyń birneshe ereksheligi bar.
Bul erekshelikterge búgin Úkimette Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasynyń jobasyn talqylaýǵa arnalǵan keńeıtilgen májilisten keıin BAQ ókilderine suhbat bergen QR Mádenıet mınıstri Muhtar Qul-Muhammed toqtalyp ótti.
«Baǵdarlamanyń eń basty ereksheligi, ony balabaqshadan bastap orta mektepte, JOO-larda memlekettik tildi oqytýdyń úzdiksiz júıesin jasaý», dep atap ótken mınıstrdiń paıymdaýynsha, ekinshi ereksheligi, barlyq memlekettik qyzmetshilerge, sondaı-aq halyqpen tikeleı qoıan-qoltyq jumys isteıtin kásip ıelerine memlekettik tildi belgili bir dárejede bilý máseleleri de kózdelgendiginde bolyp otyr.
Bul maqsattardy júzege asyrý úshin eń aldymen memlekettik til týraly zań qabyldaý kerektigin atap ótken ol, atalǵan máseleniń búgingi baǵdarlamadan kórinis tapqandyǵyn tilge tıek etti. Sondaı-aq mınıstr orys tiliniń búgingi pozıtsııasy Qazaqstanda ultaralyq qatynas tiliniń pozıtsııasyn tolyq atqaryp otyrǵandyǵyna toqtaldy. «Bul álemdegi eń úlken tilderdiń biri. Sondyqtan orys tiliniń de pozıtsııasyn saqtaý, ony keńinen qoldaný máselesi de qarastyrylǵan», degen mınıstr elimizde turatyn az ult ókilderiniń de óz ana tilin oqyp, úırenýine tolyq jaǵdaı jasalǵandyǵyn atap ótti.
«Bir sózben aıtqanda, bul baǵdarlamada kórsetilgen maqsat-mindetter ábden oryndaýǵa bolatyn mindetter dep esepteımiz. Sondyqtan aldaǵy jyldardyń ózinde qazaqstandyqtar osy baǵdarlamanyń júzege asý nátıjelerin kóre bastaıtyn bolady jáne bul baǵdarlama tek qana Úkimet tarapynan emes barlyq qoǵamdyq, memlekettik emes uıymdar, zııaly qaýym ókilderiniń qatysýymen jasalǵan baǵdarlama dep esepteımin. Árıne, bul eń aldymen qazaq tildi buqaralyq aqparat quraldaryndaǵy qazaq tildi kontentti ulǵaıtýǵa baǵyttalǵan», dedi M.Qul-Muhammed.
