Soltústik óńirlerge kósh: Túrkistan turǵyndary Shyǵys Qazaqstanǵa saparǵa shyqty
TÚRKІSTAN. KAZINFORM - Qazaqstan Respýblıkasynyń Eńbek jáne halyqty áleýmettik qorǵaý mınıstrligi tarapynan bıyl Ońtústikten Soltústikke kóshýshiler úshin 7050 kvota bólinip otyr. Sondaı-aq, qandastar men qonys aýdarýshylar úshin memlekettik qoldaý kórsetetin 7 oblys belgilendi.
Bólingen kvota negizinde bıylǵy jyldyń tórt aıynda Túrkistan oblysynan 372 adamy bar 107 otbasy soltústik oblystarǵa qonys aýdardy. Atap aıtar bolsaq, Shyǵys Qazaqstan oblysyna – 9 otbasy, Qostanaı oblysyna – 3 otbasy, Pavlodar oblysyna 49 otbasy, Soltústik Qazaqstan oblysyna – 40 otbasy, Qaraǵandy oblysyna 1 otbasy, Abaı oblysyna 4 otbasy, Ulytaý oblysyna 1 otbasy kóshken.
«Bıyl mınıstrlik tarapynan 7050 kvota bólinip otyr. Ol boıynsha qonys aýdarýshylar 7 oblysqa bara alady. ıAǵnı, Soltústik Qazaqstan oblysy - 2 702, Pavlodar oblysy - 2 603, Qostanaı oblysy - 950, Shyǵys Qazaqstan oblysy - 372, Abaı oblysy - 255, Ulytaý oblysy - 132, Qaraǵandy oblysy - 36 adam qabyldaıdy» - delingen Túrkistan oblysy eńbek mobıldiligi ortalyǵynyń baspasóz qyzmeti usynǵan aqparatta.
Atalǵan baǵdarlamany júzege asyrýǵa jeke azamattar da óz úlesin qosyp keledi. Túrkistan oblysynyń jumyspen qamtýdy úılestirý jáne áleýmettik baǵdarlamalar basqarmasynyń uıymdastyrýymen «Uly kósh» qozǵalysynyń basshysy, oblystyq máslıhat depýtaty Jańabaı Aǵabekovtyń qoldaýymen Shyǵys Qazaqstan jáne Abaı oblystaryna arnaıy delegatsııa saparǵa shyqty.
Atalǵan sapardyń basty maqsaty - eki oblysqa qonys aýdarýǵa nıetti azamattardy óńirlerdiń tynys-tirshiligimen tanystyrý. Іs-shara barysynda kóshýge nıetti 30-dan astam túrkistandyq Shyǵys Qazaqstan aýmaǵyndaǵy qonys aýdaratyn jerlerdi kórip keletin bolady.
«Jalpy, 2015 jyldan beri jumys kúshi azaıǵan Soltústik óńirlerge halqy tyǵyz ornalasqan ońtústik aımaqtarynan 14 130 adam nemese 3 187 otbasy qonys aýdardy. Memleket soltústik oblystarǵa qonys aýdarǵandardyń otbasy múshelerine bir ret 70 AEK (258 440 teńge) mólsherinde aqsha jáne alǵashqy ýaqytta úı jaldaýǵa qarjy beredi. Budan bólek, bılik olardy qysqa ýaqytqa kásibı oqýǵa jiberip, jumysqa ornalastyrýǵa, jeńildikpen baspana alýǵa kómektesedi. Al qonys aýdarǵandarǵa jumys usynǵan jumys berýshilerge 400 AEK kóleminde (1 476 800 teńge) sýbsıdııa tólenedi» - delingen Túrkistan oblysy eńbek mobıldiligi ortalyǵynyń baspasóz qyzmeti usynǵan aqparatta.
