Ońtústikten Soltústikke: Túrkistan oblysynyń Túlkibas aýdanynan 8 otbasy kóshýge nıet bildirdi
TÚRKІSTAN. KAZIBFORM - Óńirde «Qonys aýdarý» jármeńkesi jalǵasyp jatyr. Soltústik óńirden kelgen sala mamandary búgin Túlkibas, Ordabasy, Saıram, Báıdibek aýdandarynyń turǵyndarymen kezdesti.
Túlkibas aýdandyq Mádenıet úıinde eńbek kúshin qajet etetin Soltústik óńirlerge halqy tyǵyz ornalasqan Ońtústik aımaqtarynan azamattardy erikti túrde kóshirý jumystary boıynsha turǵyndarmen kezdesý uıymdastyryldy.
Delegatsııa qatarynda Pavlodar oblysynan kelgen «Eńbek mobıldiligi ortalyǵy» KMM-niń dırektory Merýert Esembaeva, Ýspen aýdandyq «Mansap» ortalyǵy fılıalynyń dırektory Serik Makataev, Aqtoǵaı aýdany ákimdiginiń «Jumyspen qamtý jáne áleýmettik baǵdarlamalar bólimi» KMM-niń basshysy Qolqanat Neǵmetýlla, Efremov aýyldyq okrýginiń ákimi Saparjan Gapý jáne Soltústik Qazaqstan oblysy Mamlıýt aýdandyq «Mansap» ortalyǵy fılıalynyń dırektory Erkin Samarhanuly, Ǵ.Músirepov aýdany ákimdiginiń «Jumyspen qamtý jáne áleýmettik baǵdarlamalar bólimi» KMM-niń basshysynyń orynbasary Baıan Shegebaev bar.
«Qonys aýdarý» jármeńkesinde Pavlodar oblystyq «Eńbek mobıldiligi ortalyǵy» KMM-niń dırektory Merýert Esembaeva Soltústikke qajetti jumys kúsh qataryn tolyqtyrý jumystaryn nasıhattasa, Soltústik Qazaqstan oblystyq Mamlıýt aýdandyq «Mansap» ortalyǵy fılıalynyń dırektory Erkin Samarhanuly qonys aýdarýshylar jaıynda beınerolıkterdi kórsetti. Sondaı-aq, ózge de sala mamandary túlkibastyqtardy soltústik óńirlerge qonystanyp, jumysqa ornalasýǵa shaqyrdy.
Іs sharaǵa 250 adam qatysty. Onyń ishinde qonys aýdarýǵa keńes alǵandar sany 30 bolsa, kóshýge 8 otbasy nıet bildirdi. Jalpy, memleket Soltústik oblystarǵa qonys aýdarǵandardyń otbasy múshelerine bir ret 70 AEK (258 440 teńge) mólsherinde aqsha, alǵashqy ýaqytta úı jaldaýǵa qarjy beredi. Budan bólek, qysqa ýaqytqa kásibı oqýǵa jiberip, jumysqa ornalastyrýy jáne jeńildikpen baspana alýǵa kómektesýi tıis. Al qonys aýdarǵandarǵa jumys usynǵan jumys berýshilerge 400 AEK (1 476 800 teńge) sýbsıdııa beriledi.
Kezdesý sońynda turǵyndar qonys aýdarý boıynsha keńes alyp, ózderin tolǵandyrǵan suraqtaryna jaýap aldy. «Qonys aýdarý» jármeńkesi óńirdegi Ordabasy, Saıram, Báıdibek aýdandarynda da ótti. Onda da Soltústik óńirdegi aýyl aımaqtyń tirshiligi jóninde keń kólemdi málimet bergen sala mamandary, kópshilikti jumys kúshi az aımaqqa qonys aýdarýǵa shaqyrdy.
Aıta keteıik, 2015 jyldan bergi kórsetkishterge sáıkes, jumys kúshi az Soltústik óńirlerge Ońtústik aımaqtardan jalpy sany 14 874 adam qonys aýdarǵan.
Eske salsaq, budan buryn nasıhat toby Maqtaaral, Saryaǵash, Keles, Qazyǵurt aýdandarynyń turǵyndarymen de kezdesken bolatyn.
