Ońtústikten Soltústikke kóshý: qonys aýdarý qarqyny qalaı

ASTANA. KAZINFORM — Elimizdiń 2023-2027 jyldarǵa arnalǵan kóshi-qon saıasatynyń tujyrymdamasy 83% paıyzǵa oryndaldy. Bul týraly Eńbek jáne halyqty áleýmettik qorǵaý mınıstri Svetlana Jaqypova málim etti.

— Sońǵy jyldary ishki eńbek utqyrlyǵynda iskerlik belsendilik baıqalyp otyr. Erikti qonys aýdarý aıasynda 2022 jyldan beri jumys kúshi artyq aımaqtardan jumys kúshi tapshy óńirlerge 28 myńǵa jýyq adam qonystandy. Tutastaı alǵanda, qonys aýdarǵan óńirlerden keri qaıtý kórsetkishi 4 ese azaıdy. Týǵan ólkege qaıta qonys aýdarý 2019 jyly 53 myń adamnan 2024 jyly 13 myń adamǵa deıin azaıdy. Sondaı-aq qonys aýdarýshylar men qandastardy beıimdeý jáne ıntegratsııalaý boıynsha qabyldanǵan sharalar soltústikke kóship barǵan azamattardyń óńirden qaıta ketý deńgeıin nólge deıin tómendetýge yqpal etti, — dedi Svetlana Jaqypova Úkimet otyrysynda.

Odan bólek mınıstr eldegi kóshi-qon protsesinde qıyndyqtar baryn aıtty.

— Geosaıası turaqsyzdyq, soltústik jáne batys aımaqtardaǵy transshekaralyq kóshi-qon qysymy jáne Qazaqstandy tranzıttik aýmaq retinde paıdalaný jaǵdaıy bar. Sonymen qatar demografııalyq ósim, halyqtyń soltústik jáne shyǵys óńirlerden kóship ketýi, ýrbanızatsııa jáne megapolısterge shamadan tys qonystanýdan týyndaǵan máseleler bar, — deıdi vedomstvo basshysy.

Eske sala ketsek, byltyr kúzde Ońtústikten soltústikke kóshkisi keletinder qatary kóbeıip jatqany týraly habarlaǵan edik. 

Aıta ketsek, byltyr ońtústikten soltústikke qonys aýdarý saıasatyn iske asyrý barysynda 1 mlrd teńgeden astam qarajat jymqyrylǵany anyqtaldy.