Ońtústikten soltústikke qonys aýdarý baǵdarlamasy nátıje bermedi – Máýlen Áshimbaev

ASTANA. KAZINFORM –  Keıingi jyldary Soltústik Qazaqstan, Pavlodar jáne Qostanaı  oblystarynda halyq sany azaıdy. Bul týraly Senatta demografııalyq ósý taqyrybyna arnalǵan Úkimet saǵatynda palata tóraǵasy Máýlen Áshimbaev aıtty.

«Aýyldyq jerlerde densaýlyq saqtaý salasyn damytý máselesi de óte mańyzdy ekeni belgili. Qazirgi tańda «Aýyldyq densaýlyq saqtaýdy jańǵyrtý» ulttyq jobasy aıasynda tıisti jumystar júrgizilip jatyr. Alaıda jekelegen óńirlerde qarajattyń ýaqytyly ıgerilmeý faktileri baıqalady. Osyǵan baılanysty Ulttyq jobaǵa, Aýyldyq aýmaqtardy damytý tujyrymdamasyna jáne óńirlik damýdyń basqa da josparlaryna engizilgen is-sharalardyń sapaly júzege asyrylýyn qamtamasyz etý qajet. Keıbir óńirlerde áleýmettik-demografııalyq jáne ekonomıkalyq teńgerimsizdiktiń saqtalýyn da syn-qaterlerdiń biri retinde atap ótken jón. Búginde ońtústik, batys aımaqtarda jáne megapolısterde halyq sany aıtarlyqtaı ósip kele jatyr. Al, soltústik aımaqtarda, kerisinshe, azaıý úrdisi baıqaldy», - dedi M. Áshimbaev.

Onyń aıtýynsha, keıingi jyldary Soltústik Qazaqstan, Pavlodar jáne Qostanaı oblystarynda halyq sany azaıǵan.

«Bul rette ońtústikten soltústikke erikti túrde qonys aýdarý baǵdarlamasy kútilgen nátıjeni bermegenin moıyndaýymyz kerek. Osy oraıda qazir Senatta qaralyp jatqan Kóshi-qon týraly jańa zań eńbek resýrstarynyń mobıldiligin arttyrý úshin jańa yntalandyrý sharalaryn qarastyrady dep senemiz. Sonymen qatar osy baǵytta basqa da is-sharalardy júzege asyrýymyz qajet. Demografııalyq jaǵdaıdy eskere otyryp, áleýmettik, transporttyq jáne ınjenerlik ınfraqurylymnyń da tıisti deńgeıde damýyn qamtamasyz etý kerek. Munamen qosa, azamattarymyzdyń jan-jaqty damýy úshin sapaly, ekologııalyq orta qalyptastyrý da mańyzdy is. Qazirgi kezde elimizdiń demografııalyq damýyna baılanysty osyndaı máseleler boıynsha tıimdi vedomstvoaralyq is-qımyldy arttyrý qajet», - dedi Senat tóraǵasy.