Ońtústikten soltústikke 66,2 myń adam kóship, onyń 3,6 myńy keri qaıtqan

ASTANA. KAZINFORM — Eńbek jáne halyqty áleýmettik qorǵaý mınıstrligi Májilis depýtatynyń saýalyna joldaǵan jaýapta ishki kóshi-qonnyń kórsetkishterin atady.

— Ulttyq statıstıka bıýrosynyń 2025 jyldyń 9 aıdaǵy derekteri boıynsha 1 326 myń adam qonys aýdardy. Onyń ishinde oblystar arasynda 619 myń adam qonys aýdarǵan. Bul 2024 jyldyń uqsas kezeńinen 22,7% joǵary (1 080 myń adam). Búginde erikti túrde qonys aýdarý tetigi ońtústik óńirlerden soltústik óńirlerge eńbek resýrstaryn qaıta bólýge jáne jumys izdep júrgen adamdarǵa, jumyssyzdarǵa jumysqa ornalasýǵa járdemdesýge baǵyttalǵan negizgi sharalardyń biri bolyp tur. Máselen, baǵdarlama bastalǵan kezden beri soltústik óńirlerge 66,2 myń adam qonys aýdardy. Onyń 3,6 myń adamy nemese 6%-y qaıtyp oraldy, — dep jazylǵan resmı málimette.

Mınıstrliktegiler mıgratsııany retteý sharalary halyq azaıyp jatqan óńirlerdegi kóshi-qonnyń teris saldosyn báseńdetkenin aıtady.

— Qonys aýdarý boıynsha qabyldanyp jatqan sharalardyń arqasynda qonys aýdarý óńirlerinde kóshi-qonnyń teris saldo deńgeıin 2019 jylmen salystyrǵanda 36%-ǵa nemese-19 myń adamǵa (-53 myń adam) tómendetýge múmkindik týdy, — delingen jaýapta.

Buǵan deıin Qazaqstannyń birneshe óńirine el óńirlerine depopýlıatsııa qaýpi tónip turǵanyn jazǵan edik.