Ońtústiktegi jer silkinisiniń dúmpýi Astanada nege sezildi – mınıstr jaýaby

ASTANA. KAZINFORM – Ǵylym jáne joǵary bilim mınıstri Saıasat Nurbek ońtústiktegi jer silkinisiniń dúmpýi Astanada nege sezilgenin aıtty.

«Ońtústiktegi jer silkinisiniń dúmpýi nege Astanada sezildi?» - dep surady jýrnalıst Ekologııa jáne tabıǵı resýrstar mınıstrinen. Alaıda bul suraqqa Ǵylym jáne joǵary bilim mınıstri Saıasat Nurbek jaýap berdi.

«Aftershoktar, seısmıkalyq tolqyn aıtarlyqtaı úlken boldy. Rıhter shkalasy boıynsha 6,5-7 dúmpý kúshine jetti. Sondyqtan jer silkinisin Ortalyq Azııa da sezdi. Terbelister Ońtústikten Soltústikke baǵyttaldy. Sondyqtan Astana turǵyndary da dúmpýdi sezindi. Biraq mundaǵy terbelis shyn máninde óte álsiz boldy», — dedi Saıasat Nurbek.

BAQ ókili buǵan deıin Almatyda sezilgen zilzalanyń áseri Qaraǵandyǵa ǵana jetkenin aıta kelip, bul joly Astanaǵa deıin sezilýiniń sebebin jer astyndaǵy ózgeristermen baılanystyrý qanshalyqty qısyndy ekenin surady. 

«Ony aıtý qıyn. Biraq jer astyndaǵy ózgeristerden emes. Astana Turan dep atalatyn platformada tur. Ol — óte ornyqty, kóne platforma. Sondyqtan tek aftershok qana sezildi. Áıtpese jer silkinisiniń ózi qýatty boldy. Jalpy ýaıymdaıtyn eshteńe joq», — dedi mınıstr.