Ońtústikte kún sýytyp, jel turady

ShYMKENT. KAZINFORM- Demalys kúnderi Shymkentte jáne Túrkistan oblysynda kún sýytyp, jel bolady.

Búgin túnde Shymkenttegi aýa temperatýrasy 7 gradýsqa deıin tómendeıdi. Sondaı-aq, demalys kúnderi de óńirde salqyn aýa-raıy saqtalady. 

«12 jáne 13 qazanda Shymkentte aýyspaly bulttylyq kútilýde. Túngi ýaqytta jańbyr jaýady. Jeldiń jyldamdyǵy kúndiz 8-13 m/s, al túnde ekpini 15-20 m/s jetedi. Túnde aýa temperatýrasy 8-12 gradýs, kúndiz 17-19 gradýs jyly bolady, - delingen «Qazgıdromet» RMK baspasóz qyzmeti usynǵan aqparatta. 

Túrkistan oblysynyń taýly jáne taý bókterindegi aýdandarynda demalys kúnderi jel kúsheıedi. 

Aýa temperatýrasy túnde 4 gradýsqa deıin tómendep, jańbyr jaýady dep kútilýde. Al, kúndiz 22 gradýs jyly bolady. 

«Oblys ortalyǵy- Túrkistan qalasynda demalys kúnderi jaýyn-shashynsyz aýyspaly bulttylyq kútiledi. Jeldiń jyldamdyǵy 8-13 m/s jetedi, - delingen «Qazgıdromet» aqparatynda. 

Sınoptıkterdiń málimetinshe, aldaǵy demalys kúnderi el aýmaǵynyń basym bóliginde kún sýytyp, qar jaýady. Búgin Soltústik Qazaqstan oblysynda alǵashqy qar jaýyp, ondaǵy aýa temperatýrasy 1 gradýsqa deıin tómendedi. Júrgizýshilerge jyldamdyqty asyrmaýǵa jáne jol erejelerin saqtaýǵa keńes beremiz.