Ońtústikte Qyzyl kitapqa engen janýarlar transheıaǵa túsip ólip jatyr
TÚRKІSTAN. KAZINFORM — Qyzyl kitapqa engen baýyrymen jorǵalaýshylar jáne úı janýarlary transheıada ólip ketip jatyr.
Túrkistan oblysynda transheıa qazý toqtamaı tur. Aýyl sharýashylyǵy maqsatynda jer alǵan sharýalar aýmaqty qorshaýdyń tıimdi ádisine kóshken.
ıAǵnı, aýmaǵyn arnaıy materıaldarmen qorshap shyǵyndalmaı-aq aınala bir metr tereńdikte qazyp tastaıdy.
Bul tásil sharýaǵa tıimdi bolǵanymen tabıǵatqa orasan zor zalalyn tıgizip otyr. Atap aıtar bolsaq, túrli baýyrymen jorǵalaýshylar men úı janýarlary sol transheıaǵa túsip qaıta shyǵa almaı, ólip ketip jatyr.
Sondaı-aq, bul tásildiń topyraqtyń qunarly qabatynyń birjola joıylýyna alyp keletin zardaby da bar.
Túrkistan oblysynyń jer qatynastary basqarmasynyń basshysy Erǵalı Tilegen usynǵan málimetke súıensek, 2023-2024 jyldary Báıdibek, Keles, Otyrar, Saryaǵash, Tólebı, Túlkibas aýdandary boıynsha 186 jer paıdaldanýshy tarapynan transheıa qazylǵany anyqtalǵan.
Zerdeleý jumysynyń barysynda 118 jer paıdalanýshynyń qazǵan transheıalary kómilip, qalpyna keltirý jumystary júrgizilgen.
Sonymen qatar, 9 jer paıdalanýshyǵa Ákimshilik quqyq buzý kodeksi 337-babynyń talaptaryna sáıkes, aıyppul salynǵan.
— Atalǵan kodekstiń 337-babynyń 1-tarmaǵyna sáıkes, topyraqtyń qunarly qabatyn sydyryp alý topyraqtyń qunarly qabatynyń birjola joǵalýyn bolǵyzbaý úshin qajet bolǵan jaǵdaılardy qospaǵanda, topyraqtyń qunarly qabatyn, onyń ishinde basqa tulǵalarǵa satý nemese berý maqsatynda joıý nemese zańsyz sydyryp alý — jeke tulǵalarǵa — qyryq, laýazymdy adamdarǵa, shaǵyn kásipkerlik sýbektilerine nemese kommertsııalyq emes uıymdarǵa — jeti júz, orta kásipkerlik sýbektilerine — bir myń, iri kásipkerlik sýbektilerine eki myń aılyq eseptik kórsetkish mólsherinde aıyppul salýǵa alyp keledi. Aýdan, qala ákimdikterimen jer paıdalanýshylarǵa jerdi qorǵaý ıaǵnı, jer ýchaskelerin maqsatyna saı utymdy paıdalaný boıynsha túsindirme jumystaryn turaqty júrgizý boıynsha tıisti tapsyrmalar berilgen, — delingen basqarma aqparatynda.
Al, tabıǵat qorǵaýshylar transheıa qazǵan sharýalardyń nemquraıly áreketinen qyzyl kitapqa engen jándikter men janýarlar ólip ketip jatqandyǵyn aıtyp, dabyl qaǵyp jatyr.
— Ótken jyldyń mamyr aıynyń basynda bir aptalyq ekspedıtsııaǵa shyqtyq. Onda Keles, Shardara, Saryaǵash, Otyrar, Saýran, Arys, Ordabasy, Báıdibek aýdandaryn araladyq. Aımaqtaǵy qazylǵan transheıalarǵa túsip ketip, shyǵa almaı qalǵan Orta Azııalyq tasbaqalardyń óte kóp ekendigin kórdik. Sondaı-aq, qyzyl kitapqa engen sary baýyr kesirtke, keles kesirtkesi, qalqan tumsyq jylan, oq jylan jáne basqa da jándikter men janýarlar kezdesti. Birazyn ózimiz qazylǵan ordan shyǵaryp aldyq. Sý, tamaq berip, qaýipsiz jerge jiberdik. Sodan jaýapty mamandarǵa hat joldadyq. Bıyl da jyldyń basynan bastap ýakiletti organdarǵa hattar jiberdik. Aldaǵy eki aıda tasbaqalar uıqylarynan qaıta oıanady. Sol kezde qaıtadan sol orlarǵa túsip ketýdiń aldyn alýymyz kerek, — deıdi «Syrdarııa-Túrkistan» óńirlik tabıǵı parkiniń ǵylymı qyzmetkeri Ǵanı Nazarbek.
Aıta keteıik, budan buryn Túrkistan oblysynda bir ózi eki aýdanǵa qaraıtyn aýyldar bar ekenin jazǵan bolatynbyz.
