Ońtústikte aptap ystyqtan elektr jelilerine júkteme artty
ShYMKENT. KAZINFORM – Aýa raıynyń kúrt ysýyna baılanysty óńirdiń elektr jelilerine qyzmet kórsetetin «Ońtústik Jaryq Tranzıt» mekemesi Shymkent qalasy men Túrkistan oblysynyń turǵyndaryna eskertý jasady.
Kompanııanyń málimetinshe, 17-19 shilde aralyǵynda aýa temperatýrasynyń joǵarylaýyna baılanysty elektr energııasyn tutyný kólemi artyp, elektr jelilerine túsetin júkteme kóbeıedi.
Osyǵan baılanysty keıbir aýmaqtarda elektr energııasynyń ýaqytsha úzilýi nemese kerneý deńgeıiniń tómendeýi yqtımal.
Qazirgi tańda «Ońtústik Jaryq Tranzıt» JShS-niń jedel-apattyq brıgadalary kúsheıtilgen jumys rejımine kóshken.
– Mamandar elektr jelilerindegi aqaýlardy anyqtap, olardy barynsha qysqa merzimde joıý jáne tutynýshylardy elektrmen jabdyqtaýdy qalpyna keltirý jumystaryn júrgizip jatyr, – delingen kompanııa habarlamasynda.
Sondaı-aq kompanııa turǵyndardy elektr energııasyn uqypty ári tıimdi paıdalanýǵa shaqyryp, ýaqytsha qolaısyzdyqtarǵa túsinistikpen qaraýdy surady.
Buǵan deıin Shymkent pen Túrkistanda aptap ystyq jalǵasatyny týraly habarlaǵan edik.
