Ońtústikte shegirtke qaptady: 1 mamyrǵa deıin ýlap bitpese, kúres zaıa ketedi
TÚRKІSTAN. KAZINFORM — Túrkistan oblysy jyl saıyn shegirtkeden zardap shegedi. Ásirese, násibin jer anadan tergen sharýalar úshin jaǵdaı qıyn.
Kún sanap kógertip otyrǵan egistigin qorǵamasa, qyp qyzyl shyǵynǵa batary anyq. Sondyqtan, óńirde shegirtkemen kúresý kóktem bastalysymen qolǵa alynatyn kásipke aınalyp barady.
Shegirtke dernásilderiniń alǵashqy shyǵýy 3 sáýir kúni Arys qalasy aýmaǵynda anyqtalǵan. Qazir jumysshy top 24/7 rejıminde jumys istep jatyr.
Bul baǵytta arnaıy tehnıkamen qatar drondar jáne AN-2 ushaǵy jumyldyrylǵan.
— Bıyl Túrkistan oblysy boıynsha asa qaýipti Marokko shegirtkesine qarsy óńdeý sharalary 372 myń ga aýmaqqa júrgiziledi dep josparlanyp otyr. Ár aýdanǵa oblystyq basqarmalar men mekeme basshylarynan jaýaptylar bekitilgen. 4 jedel shtab qurylyp, jumys kúshi jasaqtaldy. Jalpy, shegirtke zııankesine qarsy 1058 myń ga aýmaqty zertteý josparlanǵan. Qazirgi tańda 605,5 myń ga zertteldi. Onyń ishinde 250 myń ga aýmaq ekonomıkalyq zııandy sheginen asty. Búgingi kúnge 242 myń ga jer óńdeldi, — delingen Túrkistan oblysy ákimdigi usynǵan aqparatta.
Shegirtke zııankesi 9 aýdannyń aýmaǵyna qonystanǵan. Ásirese, Arys qalasy men Saryaǵash, Keles aýdandarynyń aýmaǵynda kóp baıqalǵan. Búginde ondaǵy jaıylym jer alqaptary 65 aımaqqa bólindi.
Jumysshy top ta jasaqtalyp, óńdeýge kiristi. 2 990 jaıylym jer ıelerine habarlama berildi. Sonymen qatar, 65 jumysshy topty tasymaldaýǵa kólik qarastyryldy.
Sý jetkizýge 45 arnaıy avtokólik bólinse, janar-jaǵarmaı jetkizýge 30 arnaıy avtokólik ázirlengen.
Jumysshylardy azyq-túlikpen qamtamasyz etý aýdan-qala ákimdikteri men demeýshiler tarapynan uıymdastyrylyp keledi.
Sondaı-aq, anyqtaýshylar men hımııalyq ýly preparatpen jumys isteıtin azamattardyń densaýlyǵy turaqty baqylaýǵa alynǵan.
— Alǵashqy anyqtalǵan dernásil satysynda aspaly búrikkishpen óńdeý tıimdiligi anyqtalyp, jalpy 861 dana aspaly búrikkishpen jumys jasaldy. Hımııalyq óńdeý josparynyń 317,8 myń gektarynyń 273-i jerústi búrký tehnıkasymen atqaryldy. Al 54,2 myń gektar aýmaqta 4 AN-2 ushaǵy jumys istedi. Qosymsha 41 tehnıka, 5 gazogenerator, 12 dron jumyldyryldy. Hımııalyq óńdeýde «Tıametrın», «Karate» preparattary paıdalanylyp jatyr, — deıdi ákimdikten.
Shegirtkemen kúreske arnaıy mamandarmen qatar jergilikti turǵyndar men eriktiler de kómekke kelgen. Olar negizinen dernásil oshaqtaryn anyqtap, belgi qoıyp ketedi. Sodan keıin mamandar óńdeý jumysyn júrgizedi.
Jaıylym ıeleri de kúndelikti nysan basynda. Hımııalyq óńdeýshilerge kómektesip, qol ushyn berip júr. Sonyń biri — Juman Qaldarbekuly.
— Bıyl óńirde shegirtkemen kúres qarqyndy júrip jatyr. Aldyńǵy jylǵa qaraǵanda kólemi azaıdy. Tehnıka kelip, zııankesterdi joıyp jatyr. Basy-qasynda júrgen barsha adamǵa rahmet, — deıdi ol.
Al, Áýezhan Nazarqasymuly atty qoǵam belsendisi áleýmettik jelide shegirtke dernásilderdiń ekinshi tolqyny kelip jetkenin jazyp dabyl qaqty.
— Arys óńirinde shegirtke shabýyly talaıdy áýrege salyp jatyr. Tabıǵı apatpen kúres tolastamaı tur. Bolsa da mundaı maıdanda jergilikti halyq ta birge jumys istemese is qıynǵa shaýyp ketýi múmkin. Dál qazirgi kezeńde mamandar kún-túnge qaramaı eńbek etýde, — deıdi ol.
Agroónerkásiptik keshendegi memlekettik ınspektsııa komıtetiniń Túrkistan oblystyq aýmaqtyq ınspektsııasy basshysynyń orynbasary Marat Orynbaev shegirtkeni túbegeıli joıyp jiberý múmkin emes deıdi.
— Bir shegirtke 100-ge jýyq tuqym qoıady. ıAǵnı, bir shegirtkeden 100 shegirtke taraıdy degen sóz. Hımııalyq óńdeý barysynda qalyp ketken biren-sarań shegirtkeniń kóp uzamaı-aq qaıtadan kóbeıetininiń sebebi osy. Sondaı-aq, shegirtkeler únemi kóship otyrady. Kók shóp izdep egistikke túsedi. Sodan sarǵaıtyp, qurǵatyp jiberedi. Kóship júrgennen keıin dárileıtin aýmaqtyń da kólemi arta beredi, — deıdi Marat Orynbaev.
Sondaı-aq, ol shegirtkelerdiń bul aımaqta burynnan bolǵanyn jetkizdi.
— Ata-babamyz oshaǵyn anyqtaǵan kezde jerdi qazyp, qurǵaq shóp salyp, órtep jiberip otyrǵan. Keıin «dýst» degen hımııalyq qospa qoldanyldy. Sol kezderi qatty áser bergen. Degenmen, ol adam densaýlyǵyna, ekologııaǵa teris áser etetindikten qoldanystan alynyp tastaldy. Qazirgi qoldanylyp jatqan hımıkattardyń adam densaýlyǵy men qorshaǵan ortaǵa zııany joq, — deıdi Marat Orynbaev.
Mamandardyń sózine súıensek, 1 mamyrda sheritke dernásilderi eresek kezeńine ótedi. Soǵan deıin dárileý jumystary da tolyǵymen júrgizilip bitýi tıis.
Aıta keteıik, budan buryn bıyl shegirtkemen kúreske 7 mlrd teńge bólinetinin jazǵan bolatynbyz.