Ońtústikke qosymsha qýat: 500 kV eki elektr jelisi salynyp jatyr
ASTANA. KAZINFORM — Energetıka mınıstrligi «KEGOC» AQ-men birlesip, ulttyq elektr jelisin kúsheıtý boıynsha mańyzdy jobalardy iske asyrýda. Elektr energııasyn tutynýdyń ósýi jáne generatsııa qýattarynyń damýy jelilik ınfraqurylymnyń ótkizý qabileti men senimdiligine qoıylatyn talaptardy arttyrmaq. Bul týraly vedomstvonyń baspasóz qyzmeti málim etti.
Ońtústik óńirlerdegi tutynýshylardy elektr energııasymen jabdyqtaýdyń senimdiligin arttyrý jáne Ortalyq Azııa elderiniń energetıkalyq júıeleriniń jumys rejımderine baılanysty shtattan tys jaǵdaılardyń týyndaý táýekelderin tómendetý Ońtústik aımaqtyń elektr jelilerin kúsheıtýdi talap etedi.
— Osy maqsatta qazirgi ýaqytta 500 kV «Shý — Jambyl» jáne «Jambyl — Shymkent» elektr berý jelileri salynýda. Olar iske qosylǵannan keıin «Soltústik — Ońtústik» tranzıtiniń «Almaty — Jambyl» qımasyndaǵy ótkizý qabileti 440 MVt-qa artady. Qosymsha jelilik qýattar jańa generatsııa kózderin jelige qosýǵa, júktemeni ıkemdi túrde bólýge jáne jelilik shekteýlerdiń áserin azaıtýǵa múmkindik beredi. Jobany aıaqtaý 2027 jyldyń ortasyna josparlanǵan, — delingen habarlamada.
Sonymen qatar Batys Qazaqstannyń energııa júıesin eldiń biryńǵaı elektr energetıkalyq júıesiniń negizgi bóligimen biriktirý jobasy iske asyrylýda. Joba aıasynda 500 kV «Ólke — Qarabatan» elektr berý jelisi salynýda. Joba Batys aımaqtyń eldiń qalǵan energııa júıesimen baılanysyn nyǵaıtyp, Atyraý jáne Aqtóbe oblystaryndaǵy elektr stantsııalarynyń qýatyn berýdiń múmkindikterin keńeıtedi, sondaı-aq Batys óńirdiń manevrlik generatsııasyn basqa aımaqtardaǵy energııa teńgerimsizdigin óteý úshin tıimdirek paıdalanýǵa múmkindik beredi. Jobany aıaqtaý da 2027 jylǵa josparlanǵan.
Jalpy, iske asyrylyp jatqan jobalar joǵary kerneýli elektr berý jelileri arqyly energııa júıesin saqınaly shemamen qamtýdy aıaqtaýǵa jáne Ulttyq elektr jelisiniń nysanaly topologııasyn qalyptastyrýǵa baǵyttalǵan.
Aıta keteıik, elimizde jańartylatyn energııa úlesi 6 jylda 4 ese ósti.
