Ońtústik-Shyǵys Azııadaǵy sý tasqyny: 1100-den astam adam qaza tapty

ASTANA. KAZINFORM — Seısenbi kúni Indonezııanyń Sýmatra aralyndaǵy joıqyn sý tasqyny men kóshkinnen qaza tapqandar sany 631 adamǵa jetti, mıllıonǵa jýyq adam evakýatsııalandy, dep habarlaıdy English Al Arabiya. 

Qutqarýshylar iz-tússiz joǵalǵan 472 adamdy izdestirý jumystaryn júrgizip otyr.

Indonezııanyń Tabıǵı apattardy basqarý agenttiginiń málimetinshe, 28 myńnan astam úı zaqymdanyp, 1,5 mln adam zardap shekti.

Tropıkalyq daýyl áserinen kúsheıgen mýssondar Ońtústik-Shyǵys Azııadaǵy sońǵy jyldardaǵy eń qatty sý tasqyndarynyń birin týdyrdy.

Sý tasqynynan Shrı-Lankada 334 adam, al Taılandta 176 adam qaza tapty.

Meteorologtardyń pikirinshe, Ońtústik-Shyǵys Azııada aýa raıynyń qolaısyz jaǵdaıy Fılıppındi basyp ótken «Koto» taıfýnynyń áserinen bolýy múmkin.

BBC jazýynsha, aımaqtaǵy jyl saıynǵy mýsson maýsymy ádette maýsymnan qyrkúıekke deıin sozylady, kóbine qatty jańbyr jaýady.

Jekelegen ekstremaldy aýa raıy qubylystaryn klımattyń ózgerýimen baılanystyrý qıyn bolǵanymen, ǵalymdardyń aıtýynsha, bul jıi jáne qatty daýyldarǵa ákelip soǵady, bul óz kezeginde qatty jańbyrǵa, sý tasqynyna jáne kúshti jelge ákeledi.

Buǵan deıin Indonezııa men Taılandta tropıkalyq daýyl saldarynan 4 mıllıonnan astam turǵyn zardap shegip, 600-den astam adam kóz jumǵanyn jazdyq. Jergilikti bılik gýmanıtarlyq kómektiń talan-tarajǵa túskenin habarlady.