Ońtústik-Shyǵys Azııada nóser saldarynan 320-dan astam adam qaza tapty

ASTANA. KAZINFORM — Ońtústik-Shyǵys Azııadaǵy joıqyn sý tasqyndary saldarynan qaza tapqandar sany keminde 326 adamǵa jetti, dep habarlaıdy Reuters agenttigi.

Bılik ókilderi qutqarý jumystaryn jalǵastyryp, elektrmen jabdyqtaý jáne baılanysty qalpyna keltirip jatyr, sondaı-aq sý tartylǵan saıyn keltirilgen shyǵyndy eseptep, baǵalap jatyr.

Joıqyn apat Indonezııa, Malaızııa jáne Taılandtyń biraz aýmaǵyn qamtydy — bul elder tsıklon týdyrǵan tolassyz jańbyrdan zardap shekti. Malakka buǵazynda bir mezette sırek kezdesetin tropıkalyq daýyl qalyptasyp jatyr. Shrı-Lankada bılik taǵy 46 adamnyń qaza tapqanyn habarlady.

Indonezııanyń Sýmatra aralynda jaǵdaı eń aýyr kúıinde qalyp otyr: 174 adamnyń qaza tapqany rastaldy, 79 adam iz-túzsiz joǵalǵandar qatarynda. Myńdaǵan otbasy baspanasyz qaldy.

Padang-Parıaman aýdanynda sýdyń deńgeıi bir metrge deıin jetken, al qutqarýshylar keı turǵyndarǵa áli de jete almaı otyr. Adamdar azyq-túlik tapshylyǵyna shaǵymdana bastady: keıbireýleri sý qaýipti deńgeıge kóterilgen kezde úıleriniń joǵarǵy qabattaryna kóshýge májbúr bolǵan.

Batang Torý qalasynda jergilikti turǵyndar úıindiler arasynan tabylǵan jáne kim ekeni anyqtalmaǵan jeti adam denesin ýaqytsha qazylǵan ortaq qabirge jerledi. Bılik joldardy tazartý, baılanysty qalpyna keltirý jáne gýmanıtarlyq kómek jetkizýdi jalǵastyryp jatyr.

Al Taılandta sý tasqynynyń qurbandary 145 adamǵa jetti, zardap shekkenderdiń sany 3,5 mıllıonnan asady. Hatıaı qalasynda sý deńgeıi tómendep kele jatqanyna qaramastan, kóptegen aýdandar áli de sý astynda qalyp otyr jáne elektr jaryǵy joq. Turǵyndar qıraǵan úılerine oralyp, keltirilgen shyǵyndy esepteı bastady, keıbiri múlkin túgel joǵaltqan.

Malaızııada «Senıar» tropıkalyq daýylynyń saldarynan eki adam qaıtys boldy. Daýyldyń álsiregenine qaramastan, sınoptıkter kezekti jańbyr, jel jáne qaýipti tolqyn yqtımaldyǵy týraly eskertip otyr. Evakýatsııalyq ortalyqtarda shamamen 30 myń adam qalǵan. Malaızııa SІM Taılandtaǵy apat aımaǵynda ornalasqan 25-ten astam qonaqúıden 1459 azamattyń evakýatsııalanǵanyn, taǵy shamamen 300 adamnyń kómek kútetinin málimdedi.

Apat sońǵy jyldardaǵy óńirdegi eń iri tabıǵat qubylystarynyń biri bolyp otyr, al onyń saldaryn joıýǵa uzaq ýaqyt qajet bolatynyn bılik boljap otyr.

Eske sala ketsek, Taılandta sý tasqynynan qaza tapqandar sany 145 adamǵa jetkenin jazdyq.