«Ońtústik» óńirlik qolbasshylyǵynyń áskerı qyzmetshisi jeńil atletıkadan el chempıony atandy
ASTANA. KAZINFORM – Qazaqstan Respýblıkasynyń jeńil atletıkadan ótken chempıonatynda «Ońtústik» óńirlik qolbasshylyǵynyń áskerı qyzmetshisi efreıtor Rınat Kýlygın 10 shaqyrym qashyqtyqqa júgirýden jeńiske jetti. Bul týraly Qorǵanys mınıstrliginiń baspasóz qyzmeti habarlady.
Respýblıkalyq jarys Almaty qalasynda Týrızm jáne sport mınıstrliginiń qoldaýymen ótti. Saıysqa elimizdiń 40-tan asa úzdik sportshysy qatysty. Rınat Kýlygın márege birinshi bolyp jetip, óziniń jeke rekordyn (31 mınýt 13 sekýnd) ornatty.
Bul jeńis áskerı qyzmetshiniń ulttyq deńgeıdegi kezekti jetistigi edi. Rınat Kýlygın – Qazaqstannyń 12 dúrkin chempıony, sondaı-aq Azııa chempıonattarynyń birneshe márte júldegeri. Onyń Kýveıt pen Koreıa Respýblıkasynda ótken halyqaralyq jarystarǵa da qatysqan tájirıbesi bar.
Rınattyń sporttyq joly Jambyl oblysy Merki aýdanynda bastalǵan. Ol balalar men jasóspirimder sport mektebinde jattyqtyrýshy Dmıtrıı Ivanchýkovtyń jetekshiligimen jattyqqan. Áskerı qyzmette bolǵanyna qaramastan, sportshy bapkerimen udaıy baılanysta bolyp, jattyǵý josparyn oryndap júr.
Rınat Kýlygın Qarýly kúshter qatarynda 2024 jyldyń kókteminen beri qyzmet etip keledi. Ol Gvardeısk garnızonyndaǵy kishi mamandardy daıarlaý oqý-jattyǵý ortalyǵynda daıyndyqtan ótip, tank brıgadasynda mehanık-júrgizýshi bolyp taǵaıyndalǵan. Qazirgi ýaqytta kelisimshart boıynsha áskerı qyzmet atqaryp, aǵa radıotelefonıst laýazymynda qyzmet etip júr.
«Ońtústik» óńirlik qolbasshylyǵy áskerleriniń qolbasshysy general-maıor Erjan Ybyraev áskerı qyzmetshiniń bul jeńisi Qarýly kúshterdiń bedelin arttyrýǵa jáne jastar arasynda salaýatty ómir saltyn nasıhattaýǵa eleýli úles qosatynyn atap ótti.
Aldaǵy ýaqytta Rınat Kýlygın bıylǵy jyldyń shilde aıynda Qytaıda 23 jasqa deıingi jastar arasynda ótetin Azııa chempıonatyna qatysýdy, oǵan qosa dene daıyndyǵy jáne jattyqtyrýshylyq baǵytta bilimin jalǵastyrýdy josparlap otyr.
Eske sala keteıik, buǵan deıin Qorǵanys mınıstrligi kýrsanttary baǵdarlama jasaqtaý olımpıadasynda kósh bastaǵanyn habarlaǵan edik.
