Ońtústik óńirlerge 30 myń tonna astyq jetkizildi
ASTANA. KAZINFORM — Azyq-túlik kelisimshart korporatsııasy egin jınaý naýqany kezinde óz qorlaryndaǵy bos astyq kólemin azaıtýda. Shilde-tamyz aılarynda ulttyq astyq operatory Túrkistan oblysyna bıdaı tıelgen 427 vagon jóneltti. Bul týraly AShM málim etti.
Jalpy, óńir Soltústik Qazaqstan jáne Aqmola oblystaryndaǵy elevatorlardan 30 myń tonna astyq ónimin aldy. Jetkizilgen astyqtyń basym bóligin úshinshi jáne tórtinshi synypty bıdaı qurady. Astyqty óńirler arasynda qaıta bólý bıdaı óndirý múmkindigi klımattyq jáne topyraq jaǵdaılaryna baılanysty shekteýli óńirdegi azyq-túlik teńgerimin saqtaýǵa múmkindik beredi.
Sonymen qatar soltústik óńirlerden astyq jóneltý jańa ónimdi qabyldaý úshin elevatorlardyń syıymdylyǵyn bosatýǵa jol ashady. Aýyl sharýashylyǵy mınıstri Aıdarbek Saparov egin jınaý naýqanyna deıin astyq qabyldaý ınfraqurylymyn ýaqtyly daıyndaýdy tapsyrǵan bolatyn.
— Bos astyq qorlarynyń azaıýy memlekettik qorǵa áser etpeıdi. Korporatsııanyń astyq bazalarynda azyq-túlik qaýipsizdigin qamtamasyz etýge arnalǵan 500 myń tonna azyq-túlik astyǵy turaqty túrde saqtalady. Taǵy 200 myń tonnany turaqty jem qory quraıdy. Ol qus jáne mal sharýashylyǵy kásiporyndaryn, quramajem óndiretin zaýyttardy qoldaý úshin paıdalanylady. Sondaı-aq qurǵaqshylyq, tótenshe jaǵdaılar nemese ózge de kútpegen jaǵdaılar týyndaǵan kezde bul qordy paıdalanýǵa bolady, — delingen habarlamada.
Astyq qorlary Azyq-túlik kelisimshart korporatsııasynyń enshiles kásiporny — «Astyq qoımalary» seriktestiginiń astyq bazalarynda jáne seriktes elevatorlarda saqtalady. Olardyń jalpy astyq saqtaý syıymdylyǵy 8,9 mln tonnadan asady.
Azyq-túlik qaýipsizdigi salasyndaǵy memlekettik saıasat pen negizgi tásilderdi Aýyl sharýashylyǵy mınıstrligi aıqyndaıdy. Al ulttyq operator retinde Azyq-túlik kelisimshart korporatsııasy astyqty satyp alýdy, saqtaýdy jáne óńirler arasynda qaıta bólýdi júzege asyrady.
Jyl saıyn astyq qory aýyl sharýashylyǵy taýaryn óndirýshilerden astyq satyp alý arqyly tolyqtyrylyp, jańartylyp otyrady. Egin jınaý aıaqtalǵannan keıin forvardtyq baǵdarlamaǵa qatysatyn sharýalar astyqty memlekettik qorǵa jetkize bastaıdy. Budan bólek, ulttyq operator qordy tolyqtyrý jáne jańartý maqsatynda naryqtan taýarlyq astyq satyp alady.
Aıta keteıik, elimizde dándi daqyldardyń 61,6%-y jınaldy, 13,5 mln tonna astyq bastyryldy.
