Ońtústik óńirlerdiń sý tapshylyǵyn sheshý: Qazaqstan kórshi eldermen kelisimge keldi
ASTANA. KAZINFORM — Qanat Bozymbaev Qazaqstannyń ońtústik óńirlerine sý jetkizý máseleleri boıynsha Bishkek pen Tashkentte kelissózder júrgizdi, dep habarlaıdy Úkimettiń baspasóz qyzmeti.
28 shilde kúni Premer-mınıstrdiń orynbasary Qanat Bozymbaev jumys saparymen Qyrǵyzstanǵa baryp, Qyrǵyz Respýblıkasy Mınıstrler kabınetiniń tóraǵasy Adylbek Kasymalıevpen jáne salalyq vedomstvolar basshylarymen kelissózder júrgizdi.
— Taraptar Naryn kaskady, Talas basseıni, sondaı-aq Kırov jáne Orto-Tokoı sý qoımalarynyń tamyz aıyndaǵy jumys tártibin talqylady. Kezdesý nátıjesinde buryn bekitilgen kelisimder aıasynda qýańshylyq pen sýdyń az kelýi saldarynan jetpeı qalǵan sý kólemin qosymsha jetkizý jóninde kelisimge qol jetkizildi, — delingen habarlamada.
29 shilde kúni Qanat Bozymbaev Tashkent qalasynda Ózbekstan Premer-mınıstri Abdýlla Arıpovpen jáne sý-energetıka salasynyń basshylarymen kelissózder júrgizdi. Kezdesý barysynda sý berý kestesinen qalyp qoıǵan jaǵdaıdy eki apta ishinde qalpyna keltirý boıynsha naqty sharalar kelisildi.
Osylaısha Jambyl, Qyzylorda jáne Túrkistan oblystarynda vegetatsııa kezeńiniń aıaqtalýy tolyq kólemde qamtamasyz etiledi. Bul másele Úkimet pen óńirlik bıliktiń turaqty baqylaýynda tur.
Budan buryn Qanat Bozymbaev tabıǵı apattardan turǵyn úılerdi mindetti saqtandyrý júıesin ázirleý barysyn tekserdi.